BEYNƏLXALQ KANOE FEDERASİYASININ PREZİDENTİ GƏNCLƏR VƏ İDMAN NAZİRLİYİNDƏ OLMUŞDUR
AZƏRTAC xəbər verir ki, Azərbaycanda səfərdə olan Beynəlxalq Kanoe Federasiyasının prezidenti Ulrix Feldhof martın 29-da gənclər və idman naziri Azad Rəhimovla görüşmüşdür.
A.Rəhimov qonağa məlumat vermişdir ki, 2007-ci ildə Azərbaycan idmançıları olimpiya və qeyri-olimpiya idman növləri üzrə keçirilmiş beynəlxalq yarışlarda 452 medal qazanmışlar, ölkəmizdə bir çox idman növləri üzrə Avropa və dünya çempionatları yüksək səviyyədə keçirilmişdir.
Nazir vurğulamışdır ki, Prezident İlham Əliyevin təşəbbüsü və tapşırığı ilə Azərbaycanın bütün bölgələrində müasir standartlara çavab verən Olimpiya idman kompleksləri inşa edilir.
Azad Rəhimov bu günlərdə Mingəçevirdəki “Kür” Olimpiya tədris-idman mərkəzində başa çatan akademik avarçəkmə, baydarka və kanoe üzrə beynəlxalq “Prezident kuboku” reqatası haqqında danışarkən bildirmişdir ki, Azərbaycan, Rusiya, Gürcüstan və İranın 18 və 23 yaşadək avarçəkənləri iştirak etdikləri turnirdə idmançılarımız 13 medal qazanmışlar.
Beynəlxalq Kanoe Federasiyasının prezidenti Ulrix Feldhof Azərbaycanda idmanın inkişafına göstərilən diqqət və qayğıdan məmnun qaldığını vurğulamışdır. Qonaq bildirmişdir ki, biz uzun illərdir ki, bir çox federasiyalarla əlaqələr qurmuşuq, onların fəaliyyətlərini yaxından izləyirik. Amma Azərbaycanın Milli Avarçəkmə Federasiyasının qısa bir zamanda gördüyü işlər olduqca təqdirəlayiqdir.
Görüşdə bir sıra məsələlər müzakirə olunmuş və yaxın vaxtlarda avarçəkmə üzrə xüsusi proqramların işlənib hazırlanması tövsiyə edilmişdir.
Bölmənin digər xəbərləri
