COP29
Beynəlxalq QHT-lər Bakıda keçiriləcək COP29-a böyük maraq göstərirlər
![](/files/galleryphoto/2024/2/1200x630/17177653231254352720_1200x630.jpg)
![](/files/galleryphoto/2024/2/1200x630/17177653236220638456_1200x630.jpg)
![](/files/galleryphoto/2024/2/1200x630/17177653236476135778_1200x630.jpg)
![](/files/galleryphoto/2024/2/1200x630/1717765323594929659_1200x630.jpg)
Bonn, 7 iyun, AZƏRTAC
Bonn şəhərində keçirilən BMT-nin İqlim Dəyişikliyi Konfransında dövlət və hökumət təmsilçiləri, beynəlxalq təşkilatlarla yanaşı, qeyri-hökumət təşkilatları da əsas iştirakçı seqmentini təşkil edir və onlar arasında Azərbaycanın ev sahibliyi edəcəyi COP29-a böyük maraq mövcuddur. Onlar Bakıda qlobal diskussiyalara - COP29-a ciddi hazırlaşırlar və Azərbaycandan olan tərəfdaşları ilə yaxından əməkdaşlıq qurmağa çalışırlar.
AZƏRTAC xəbər verir ki, aparılan söhbətlər zamanı xarici QHT-lər Azərbaycanın iqlim dəyişmələri ilə mübarizəsini yüksək qiymətləndirib, COP29-un sədri kimi ölkəmizə yüksək etimad göstərdiklərini, onları narahat edən mövzular üzrə uğurlu danışıqlar aparılacağına inandıqlarını bildiriblər. Onlar, həmçinin Bakı Enerji Həftəsini yaxından izlədiklərini, Azərbaycanın yaşıl düşüncə əsasında yürütdüyü yeni enerji siyasətini yüksək dəyərləndiriblər.
Bildirilib ki, iqlim dəyişiklikləri gündəlik həyatımızın bütün sahələrinə təsirini göstərir və vətəndaş cəmiyyəti bu proseslərə biganə qalmır. Ətraf mühit, iqlim maliyyəsi, gənclər, səhiyyə və digər sahələr üzrə ixtisaslaşmış qeyri-hökumət təşkilatları iqlim icmasının mühüm tərkib hissəsi kimi COP29-da müxtəlif mövzuların müzakirəsində fəal iştirak edəcəklər.
Nyu-York Universitetinin professoru Corc Terson bildirib ki, COP29-u səbirsizliklə gözləyir, çünki sağlamlıq məsələlərini iqlimlə bağlı danışıqlarda müzakirəyə çıxarmaq niyyətindədir. O, COP29-da öz araşdırmalarından, havanın çirklənməsinin insan sağlamlığına vurduğu zərər barəsində yeni elmi araşdırmalar əsasında hazırlanan misallar təqdim etmək istəyir və Bakıya səfərinə böyük ümidlər bəsləyir. Çünki iqlim dəyişikliklərinə diqqət artırılsa və havanın çirklənməsinin qarşısı alınsa, dünyada insanların sağlamlığına müsbət təsir göstərmək mümkün olacaq.
Qlobal Hüquq Fikirləri Cəmiyyətinin təsisçisi və prezidenti Raoman Smita Azərbaycanda keçiriləcək COP29-la bağlı gözləntilərinin böyük olduğunu deyib. O, ümidvar olduğunu bildirib ki, Azərbaycan və digər iştirakçı ölkələr iddialı iqlim planlarına, icra edilə bilən tədbirlərə diqqət yetirəcəklər və Paris Sazişi ilə uzlaşmaq üzərində işləyəcəklər. Eyni zamanda, istixana qazı emissiyalarını azaltmağa və onları 1,5 dərəcə səviyyəsində saxlamağa nail olacaqlar. Bərpaolunan enerji, külək, günəş, digər dayanıqlı enerji mənbələrinə əsaslanan texnologiyaların tətbiqi üçün fondun yaradılması və beynəlxalq səviyyədə maliyyə vəsaitlərinin oraya cəlb edilməsi də gözləntilər arasında yer alır.
“Lancet Countdown” Səhiyyə və İqlim Dəyişikliyinin İzlənməsi təşkilatının icraçı direktoru Marina Belen Romanello isə diqqətə çatdırıb ki, təmsil etdiyi təşkilat dünya üzrə təxminən 3000 tədqiqatçını bir araya gətirən beynəlxalq tədqiqat əməkdaşlıq qurumudur. Bu təşkilat sağlamlıq və iqlim dəyişikliyi arasındakı əlaqələri, iqlim dəyişikliyinin dünyanın hər yerində, hər bir ölkədə insanların sağlamlığına necə təsir göstərdiyini izləyir, xəstəliklərin yayılmasını, ölüm hallarını və insanların üzləşdiyi risklərin artım tempini araşdırır. “COP 28-dən sonra iqlim danışıqlarında sağlamlığın bu qədər ön planda olduğunu gördüyümüz üçün həyəcanlıyıq. Bakıya və COP29-a böyük ümidlərlə baxırıq. İnanırıq ki, bu gündəm davam edəcək və insanların sağlamlığını, rifahını gündəmə gətirərək iqlimlə bağlı daha firavan gələcək üçün lazımi tədbirlər həyata keçirəcəyik”, - deyə o əlavə edib.
Enerji, ətraf mühit və iqlim məsələlərinə yönəlmiş fəaliyyət göstərən Ətraf Mühitin İnkişaf Fəaliyyəti təşkilatın icraçı direktoru Emmanuel Seek növbəti COP-u təşkil etdiyinə görə Azərbaycana təbriklərini çatdırıb. O bildirib ki, onun təşkilatı iqlim dəyişikliyinin humanitar məsələlərlə əlaqələndirilməsi və problemlərin qarşısının alınması, həmçinin iqlimlə bağlı fəaliyyətlərin səhralaşma və icmaların sosial müdafiəsi ilə uzlaşdırılması ilə bağlı fəaliyyət planı hazırlayıb. O, iqlim dəyişiklikləri nəticəsində əhaliyə dəyən zərər və itkilərlə bağlı beynəlxalq yardım fondunun yaradılmasına çalışdıqlarını, Bakıda keçiriləcək müzakirələrdə bu istiqamətdə irəliləyiş əldə olunacağına ümid bəslədiyini bildirib.
Digər QHT-lərin təmsilçiləri də Bakıda keçiriləcək COP29 çərçivəsində öz sahələri üzrə mövzuları diqqət mərkəzində saxlayacaqlarını, müzakirələrdə fəal şəkildə iştirak edəcəklərini deyiblər. Onlar dünyanın ən böyük beynəlxalq tədbirlərindən biri olan COP-u qəbul etdiyinə, danışıq və müzakirələrin Bakıda aparılmasına imkan yaratdığına görə Azərbaycana minnətdarlıqlarını bildiriblər.
Elgün Niftəli
AZƏRTAC-ın xüsusi müxbiri
Bonn