BİNƏQƏDİ RAYONUNDA 20 YANVAR FACİƏSİNƏ HƏSR OLUNMUŞ SİLSİLƏ TƏDBİRLƏR KEÇİRİLİR
Bakı, 19 yanvar (AZƏRTAC). Binəqədi rayonunda 20 Yanvar faciəsinin ildönümünə həsr olunmuş silsilə tədbirlər keçirilir.
Binəqədi Rayon İcra Hakimiyyətindən bildirmişlər ki, yanvarın 19-da 20 Yanvar əlilləri və şəhid ailələri ilə görüş keçirilmişdir. Rayon İcra hakimiyyətinin başçısı Alı Qocayev 1990-cı il yanvarın 19-dan 20-nə keçən gecə sovet ordusunun əsgərləri tərəfindən Bakıda çox dəhşətli və qanlı cinayətin törədildiyini, öz hüquqlarının bərpası üçün küçə və meydanlara toplanmış əliyalın insanlara odlu silahlardan atəş açıldığını, bunun nəticəsində 137 nəfər mülki sakinin amansızcasına qətlə yetirildiyini, çoxlu sayda insanın yaralanaraq əlil olduğunu bildirmiş, bu faciəyə yalnız ümummilli lider Heydər Əliyev hakimiyyətə qayıtdıqdan sonra hüquqi-siyasi qiymət verildiyini vurğulamışdır.
Tədbirdə 20 Yanvar əlillərinə və şəhid ailələrinə maddi yardım göstərilmiş, ərzaq bağlamaları verilmişdir.
Anım mərasimi Biləcəri qəsəbəsindəki 20 Yanvar parkında ucaldılmış “Ana fəryadı” abidəsinin önündə davam etmişdir.
Tədbirdə 26 nömrəli Uşaq Gənclər Yaradıcılıq Mərkəzinin üzvləri 20 Yanvar faciəsinə aid ədəbi-bədii kompozisiya nümayiş etdirmişlər.
Bölmənin digər xəbərləri
