“Biz sülh istəyirik!” mövzusunda beynəlxalq onlayn dəyirmi masa keçirilib
Bakı, 30 dekabr, AZƏRTAC
Təhsil Nazirliyi 2 nömrəli Uşaq-Gənclər İnkişaf Mərkəzinin təşkilatçılığı ilə 31 dekabr- Dünya Azərbaycanlılarının Həmrəylik Gününə həsr olunan “Biz sülh istəyirik” mövzusunda beynəlxalq onlayn dəyirmi masa keçirilib.
Təhsil Nazirliyindən AZƏRTAC-a bildirilib ki, dəyirmi masanın keçirilməsində əsas məqsəd xarici ölkələrdə yaşayan azərbaycanlı uşaqlarla görüş təşkil etmək, onların arasında qarşılıqlı dostluq və əməkdaşlıq münasibətləri yaratmaq, həmvətənlərimizin sülh arzularının, tarixi qələbə sevincinin ifadə olunmasına şərait yaratmaqdan ibarət olub.
Dəyirmi masada ABŞ, Türkiyə, Almaniya, İsveç, Kanada, Gürcüstan, Norveç, Ukrayna, Misir və digər ölkələrdə yaşayan azərbaycanlı uşaqlar, o cümlədən 2 nömrəli Uşaq-Gənclər İnkişaf Mərkəzinin kollektivi iştirak edib.
Görüşdə iştirakçılar bütün dünya uşaqlarına sülh arzu etdiklərini, torpaqlarımızın işğaldan azad edilməsi ilə qürurlandıqlarını qeyd edib və Azərbaycanın tarixi Qələbəsi münasibətilə təbriklərini ifadə ediblər.
Bölmənin digər xəbərləri
