BMqT ilə DMX arasındakı münasibətlər uğurla inkişaf edir
Bakı, 15 may, AZƏRTAC
Dövlət Miqrasiya Xidmətinin (DMX) rəisi, II dərəcəli dövlət miqrasiya xidməti müşaviri Vüsal Hüseynov Beynəlxalq Miqrasiya Təşkilatının (BMqT) Azərbaycandakı nümayəndəliyinin rəhbəri vəzifəsini müvəqqəti icra edən Amela Mujagic və onun sələfi Vladimir Qyorqiyev ilə görüşüb.
DMX-nin mətbuat mərkəzindən AZƏRTAC-a bildirilib ki, xidmət rəisi DMX-nin BMqT ilə miqrasiya idarəçiliyinin müxtəlif istiqamətlərində sıx əməkdaşlıq etdiyini qeyd edib, əlaqələrin və tərəfdaşlığın inkişafında BMqT-nin Azərbaycandakı nümayəndəliyinin verdiyi töhfələri yüksək qiymətləndirib.
Birgə layihələrin əhəmiyyətini vurğulayan Vüsal Hüseynov hazırda BMqT ilə əməkdaşlıq şəraitində iki beynəlxalq layihənin uğurla icra olunduğunu deyib. Bildirib ki, region ölkələrində miqrasiya sahəsində potensialın gücləndirilməsinə yönələn Miqrasiya üzrə Regional Təlim Mərkəzinin yaradılması və inkişafı üçün atılmış addımlar xidmət ilə təşkilat arasında mövcud olan səmərəli əməkdaşlığın nümunəsidir.
BMqT-nin ölkəmizdəki nümayəndəliyinin müvəqqəti rəhbəri Amela Mujagic mövcud münasibətlərin uğurla inkişaf etdiyini, miqrasiya sahəsində birgə layihələrin həyata keçirilməsinin əməkdaşlığın genişləndirilməsində vacibliyini və önəmli rolunu qeyd edib.
Görüşdə qarşılıqlı maraq doğuran digər məsələlər ətrafında da müzakirələr aparılıb.
Bölmənin digər xəbərləri
