BMT Ətraf Mühit Proqramının yeni başçısı Norveç vətəndaşı olacaq
Bakı, 4 may, AZƏRTAC
BMT Ətraf Mühit Proqramının (UNEP) icraçı direktoru Norveç vətəndaşı olacaq. BMT-nin baş katibi Pan Gi Mun rəhbərlik etdiyi təşkilatın Baş Məclisində Norveç təmsilçisi Erik Solxeymin bu vəzifəyə təyin olunmasını tövsiyə edib. O, bu postda Almaniya vətəndaşı Axim Ştayneri əvəz edəcək.
AZƏRTAC BMT-nin Xəbərlər Mərkəzinə istinadla xəbər verir ki, Erik Solxeym ölkəsində 2005-ci ildən beynəlxalq inkişaf naziri, 2007-ci ildən isə ətraf mühit naziri vəzifələrini tutub. Hazırda o, təşkilatın iqtisadi əməkdaşlıq və inkişaf üzrə komitəsinin sədridir.
BMT-nin ətraf mühit üzrə ixtisaslaşmış müəssisəsi olan UNEP ətraf mühitdə baş verən dəyişiklikləri müşahidə edir, onun qorunması və təbiətdən istifadə sahəsində beynəlxalq birliyin səylərini əlaqələndirir. UNEP bitki və heyvanlar aləminin mühafizəsi, dəniz mühitinin qorunması, səhralaşmaya qarşı mübarizə, torpaqların və suyun mühafizəsi sahəsində proqramların işlənib hazırlanması və həyata keçirilməsi ilə məşğul olur. UNEP torpağın genetik fondunun qorunması, müxtəlif enerji növlərinin istifadəsi üçün təbii mühitə təsirinin öyrənilməsi və enerjinin alternativ mənbələrinin işlənməsinə xüsusi diqqət yetirir.
Bölmənin digər xəbərləri
