BMT-NİN BAŞ KATİBİ ƏFQANISTANDA KÜTLƏVİ İĞTİŞAŞLARI PİSLƏYİR

13.09.2004 [13:52]
Çap et
A⁺ A^-

AZƏRTAC-ın Sinxua Agentliyindən aldığı xəbərə görə, BMT-nin Baş katibi Kofi Annan bəyanat verərək, Əfqanıstanın Herat əyalətində törədilmiş kütləvi iğtişaşları pisləmişdir. Sənəddə deyilir kİ, Əfqanıstanın keçid hökumətinin bu bölgədə təhlükəsizliyi və sabitliyi bərpa etmək cəhdlərinə əngəl törətməyə çalışan qüvvələr fəaliyyət göstərir, baş verən iğtişaşların arxasında məhz onlar dururlar. Bu qüvvələr əfqan xalqından dəstək və kömək ala bilmirlər.

Baş katib əfqan xalqının təhlükəsizliyinin təmin edilməsi və ona yardım göstərilməsi üzrə beynəlxalq qüvvələri, habelə ölkənin əlaqədar təşkilatlarını ümumi seçkilərədək Herat əyalətində və bütün Əfqanıstan ərazisində əlverişli şərait yaratmaq üçün dərhal təsirli tədbirlər görməyə çağırır.

Bəyanatda bildirilir ki, Birləşmiş Millətlər Təşkilatı Bonn sazişinin yerinə yetirilməsini qətiyyətlə dəstəkləyir, humanitar yardım, bərpa, demokratikləşdirmə və hakimiyyət qurumları yaradılması sahəsində Əfqanıstana kömək etməyə hazırdır.

Xatırladaq ki, sentyabrın 12-də Herat əyalətində qubernatorun vəzifədən kənarlaşdırılması ilə əlaqədar kütləvi iğtişaşlar baş vermişdir. Nümayişçilər Əfqanıstan milli ordusunun kazarmasını və BMT qurumları nümayəndəliyinin binasını yandırmışlar. İğtişaşlar hələ də davam edir.

BMT-NİN BAŞ KATİBİ ƏFQANISTANDA KÜTLƏVİ İĞTİŞAŞLARI PİSLƏYİR

MÜƏLLİFLƏ ƏLAQƏ

Bölmənin digər xəbərləri