Boris Conson Britaniyanın Milad bayramınadək normal həyata qayıdacağına ümid edir
Bakı, 17 iyul, AZƏRTAC
Böyük Britaniyanın Baş Naziri Boris Conson koronavirus epidemiyasından zərər çəkən ölkəsinin Milad bayramına qədər normal həyata dönəcəyinə ümidvar olduğunu deyib.
AZƏRTAC Britaniya telekanallarına istinadla xəbər verir ki, Boris Conson artıq ardıcıl olaraq üç həftədir koronavirusa sutkalıq mindən az yoluxma halının qeydə alındığını, həmçinin xəstələr arasında ölüm hallarının azaldığını bildirib.
Baş Nazirlin sözlərinə görə, avqustun 1-dən bir çox müəssisələrin, o cümlədən gözəllik salonlarının və kazinoların fəaliyyətinə qoyulan qadağa aradan qaldırılacaq, lakin gecə klubları hələlik bağlı qalacaq.
Hakimiyyətin ümummilli karantin qərarını dəstəkləyərək bunun minlərlə həyatı xilas etdiyini vurğulayan Boris Conson bundan sonra epidemioloji vəziyyət vaxtında şəraitə uyğun müstəqil qərarlar qəbul etmək üçün yerli hakimiyyət orqanlarına daha çox səlahiyyət veriləcəyini bildirib.
Qeyd edək ki, pandemiyanın statistikasını aparan Worldometer saytının son məlumatına əsasən, Böyük Britaniyada koronavirusa yoluxanların sayı 292 min 552 nəfərə çatıb, 45 min 119 nəfər isə bu xəstəlik səbəbindən həyatını itirib.
Bölmənin digər xəbərləri
