Böyük Britaniyada məhkəmə sistemi böhran yaşayır
London, 22 may, AZƏRTAC
Böyük Britaniyada məhkəmə sistemindəki dərin böhran səbəbindən bəzi cinayət işlərinin məhkəmə prosesləri 2029-cu ildə başlayacaq.
AZƏRTAC “Independent”ə istinadla xəbər verir ki, ən gec təyin olunan məhkəmə işlərindən biri 2029-cu il yanvarın 3-də Vulviç Kral Məhkəməsində baş tutacaq. Bu işdə 38 yaşlı londonlu qadın marixuana satışı və onu saxlama ittihamı ilə mühakimə olunacaq. O, ittihamı rədd edir. İkinci iş üzrə isə üç nəfər həmin il yanvarın 15-də avtomobil oğurluğu ittihamı ilə eyni məhkəmədə mühakimə olunacaq. Onlar da özlərini təqsirsiz sayırlar.
Hər iki işin vəkili Stiven Nelson məhkəmələrin bu qədər gec təyin olunmasını ağlasığmaz adlandırıb. Qeyd edib ki, müştərilərindən biri səhhətində ciddi problemlər yaşayır və onun 2029-cu ilə qədər yaşaması belə sual altındadır.
Ədliyyə Nazirliyi də bu halların mövcudluğunu təsdiqləyərək bildirib ki, hazırda təxminən 75 min cinayət işi məhkəmə iclasını gözləyir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
