“Böyüməyən uşaqlar” kitabı çapdan çıxmışdır
Bakı, 20 fevral (AZƏRTAC). Parlament Jurnalistləri Birliyinin sədri, www.modern.az xəbər portalının baş redaktoru Elşad Eyvazlının “Böyüməyən uşaqlar” kitabı “Nurlan” nəşriyyatında nəfis tərtibatla çapdan çıxmışdır.
AZƏRTAC xəbər verir ki, nəşr Azərbaycan xalqının ümummilli lideri Heydər Əliyevin və Prezident İlham Əliyevin Azərbaycan həqiqətlərinin dünyaya çatdırılması istiqamətində qiymətli kəlamları ilə açılır.
Müəllifin məqsədi ermənilərin körpə uşaqlara yaşatdıqları dəhşətləri bir daha oxuculara və dünyaya çatdırmaqdır.
Nəşrdə yer alan mətnlər təxəyyülün məhsulu olmayıb, o dəhşətləri yaşayanların acı xatirələri, onların yaddaşlarına əbədi hopan gerçək hadisələrdir. Kitab bu acı xatirələri - yaddaşlara əbədi şəkildə hopan gerçək hadisələri unutmamaq üçündür.
Kitabın müxtəlif dillərə tərcümə edilərək ayrı-ayrı ölkələrdə yayılması da nəzərdə tutulur.
Milli Məclisin deputatı, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin idarə heyətinin üzvü Rövşən Rzayev nəşrdə yer almış “Xocalı soyqırımında ata-anasını itirən uşaqların yaşantıları” sərlövhəli yazısında bu kitabı Xocalı soyqırımı və ümumilikdə Ermənistanın Azərbaycana təcavüzü ilə bağlı həqiqətlərin dünyaya çatdırılması işinə təkan verəcək təkzibolunmaz fakt kimi dəyərləndirmişdir.
Milli Məclisin deputatı Fuad Muradovun “Tarixin ədalət məhkəməsi üçün daşdan keçən sübutlar” sərlövhəli yazısında qeyd olunmuşdur ki, “böyüməyən uşaqlar”ın xatirələri bizi bir daha düşmənə qarşı birləşməyə və işğal altında qalan torpaqlar uğrunda mübarizəsə səsləyir.
Ümumilikdə 88 səhifədən ibarət kitabda 1992-ci il fevralın 25-dən 26-na keçən gecə Xocalıda hər iki valideynini itirmiş uşaqların acı xatirələrindən bəhs olunur. Nəşrin son səhifələrində Xocalı soyqırımının nəinki xalqımıza, eyni zamanda, bəşəriyyətə qarşı törədilmiş bir cinayət olduğunu əks etdirən ağ-qara şəkillər yer almışdır. Fotolar ailə albomundan götürülmüşdür.
Kitabda fransız fotoqrafı Frederik Lengeynin çəkdiyi fotoşəkillərdən istifadə olunmuşdur.
Bölmənin digər xəbərləri
