“bp-AZƏRBAYCAN” ŞİRKƏTİNİN VİTSE-PREZİDENTİ ROB KELLİNİN ÇIXIŞI
Hörmətli qonaqlar!
Xanımlar və cənablar!
Mən sizin hamınızı salamlayıram. Mən bu gün burada, bu rəsmi açılış mərasimində ABƏŞ-in prezidenti Devid Vudvordun, habelə bp və onun “Azəri-Çıraq-Günəşli” və “Şahdəniz” layihələrində hasilatın pay bölgüsü sazişlərindəki tərəfdaşları adından çıxış edirəm. Bu tərəfdaşlar da Azərbaycan Dövlət Neft Şirkəti, “Yunokal”, “EksonMobil”, “Statoyl”, “Türk petrolları”, “İMPEKS”, “Devon”, “İtoçu”, “Luk-Acip”, “Niko” və “Total” şirkətləridir. “Eupec” boru örtükləmə obyektinin bugünkü rəsmi açılışında iştirak etməkdən mən çox məmnunam. “Azəri-Çıraq-Günəşli” yataqlarının işlənilməsinin birinci fazasının layihəsi üzrə 2001-ci ilin avqust ayında tikinti işlərinə başlanmışdır. “Şahdəniz” layihəsi üzrə isə tikinti işlərinə bu ilin fevral ayında start verilmişdir.
Həm “Azəri-Çıraq-Günəşli”, həm də “Şahdəniz” layihələrinin tikinti mərhələsi uğurla davam etdirilir. Fəxr edirik ki, bu layihələr üzrə işlərimiz planlı surətdə və büdcə çərçivəsində gedir. Biz məmnunuq ki, tikinti işlərimiz həm insanların sağlamlığının qorunması, əməyin təhlükəsizliyi, həm də ətraf mühitin və biznes etikasının qorunması baxımından ən yüksək beynəlxalq standartlara uyğun şəkildə davam edir. “Azəri” yatağından ilk nefti, nəzərdə tutulduğu kimi, 2005-ci ilin əvvəllində, “Şahdəniz” yatağından isə ilk qazı 2006-cı ilin qışında hasil etməyi planlaşdırırıq. Bu layihələr özlüyündə həm onlarda iştirak edən ayrı-ayrı şəxslərin, həm də şirkətlərin əldə etdikləri çox böyük nailiyyətdir. Eyni zamanda, Azərbaycan dövləti üçün çox böyük nailiyyətdir. Bu layihələr Azərbaycan Prezidentinin neft və qaz strategiyasını tam nümayiş etdirən sanballı əlamətlərdir. Biz bu layihələri həyata keçirməklə həm Azərbaycana, həm də bütövlükdə bu regiona böyük mənfəətlər gətirəcəyik.
Layihələrin həyata keçirilməsinin tikinti mərhələsində artıq çoxminli Azərbaycan vətəndaşları üçün iş yerləri açılmışdır. Tikinti işlərində 8 mindən çox Azərbaycan vətəndaşı çalışır. bp bu vətəndaşların gələcəkdə bizim istismar sahələrində də işləməsi üçün onların səriştə və qabiliyyətini inkişaf etdirmək məqsədi ilə dəstək verməkdə davam edəcəkdir.
Bu layihələr Azərbaycanın müxtəlif sənaye sahələrinə və infrastrukturuna investisiyaların qoyulmasını stimullaşdırmışdır. İnvestisiya qoyulan infrastrukturlar Azərbaycanda qalacaq, ölkənizin indiki layihələrini, eləcə də gələcək regional layihələri dəstəkləyəcəkdir.
Bu gün bizim açdığımız boruörtükləmə müəssisəsi də Bakıda qalacaq və bu cür sərmayələr nəticəsində yaradılmış yeni infrastrukturların ən vaciblərindən biridir.
bp “Eupec”lə boruörtükləmə sahəsində 2002-ci ilin iyul ayından bəri işləyir. O vaxtdan keçən 15 ay ərzində bu obyekt tikilib, istifadəyə verilmişdir və fəaliyyət göstərir. Bu zavodda 2003-cü ilin mart ayından başlayaraq, “Azəri-Çıraq-Günəşli” layihəsinin birinci fazası üçün boruların örtüklənməsi işi uğurla davam edir. Biz çox məmnunuq ki, belə bir obyektin tikilməsində və istismara verilməsində iştirak etmişik. Çünki hesab edirik ki, bu müəssisə doğrudan da dünya səviyyəli boruörtükləmə zavodudur.
bp bu obyektdə ətraf mühitin qorunması, əməyin təhlükəsizliyinin mühafizə olunması sahəsində əldə etdiyi çox böyük nailiyyətlərə görə “Eupec” şirkətinə təşəkkür edir. Çünki bu işlər çox yüksək səviyyədə icra olunmuşdur. Eyni zamanda, bu zavodda məhsuldarlıq çox yüksəkdir.
bp hazırda birgə müəssisə ilə sıx əlaqələr saxlayır. Biz burada nümayiş etdirilən peşəkarlıq səviyyəsindən çox məmnunuq. Ondan da çox razıyıq ki, bu birgə müəssisə Azərbaycanın yerli işçi qüvvəsinin həm texniki, həm də idarəetmə cəhətdən səriştəsini inkişaf etdirmək üçün təlim məsələlərinə çox diqqət yetirir.
“Azəri-Çıraq-Günəşli” layihəsinin birinci fazası üçün boruların örtüklənməsi plana görə gərək bu ilin sonuna qədər başa çatsın. Gələn il isə biz layihənin ikinci fazası və “Şahdəniz” layihəsi üçün sualtı boru kəmərlərində istifadə olunacaq boruların örtüklənməsinə başlayacağıq. bp gələn ildə də müəssisə ilə uğurlu əməkdaşlığa, habelə onun gələcəkdə də sağlamlığın, ətraf mühitin və əməyin təhlükəsizliyinin qorunması sahəsində yüksək nəticələr əldə edəcəyinə əmindir.
bp və onun Azərbaycandakı layihələrlə bağlı tərəfdaşlarının hamısı burada uzun müddət işləmək niyyətindədir. Biz bunu öhdəmizə götürmüşük və onu çoxlu sərmayə qoymaqla nümayiş etdiririk. Qarşıdan gələn bir neçə ildə Azərbaycanın neft sənayesinə 18 milyard dollar sərmayə qoyulacaqdır. Bu, elə sərmayədir ki, bp-nin uzun müddət Azərbaycanda, üzümüzə gələn onilliklər ərzində həm Gürcüstanda, həm də Türkiyədəki işlərini davam edəcəyinə təminat verir.
“Azəri-Çıraq-Günəşli” yataqlarının tammiqyaslı işlənilməsinin birinci fazasına 2001-ci ilin avqust ayında sanksiya verildi, yəni, tikinti işləri başlandı. Həmin o mərasimdə bp-nin Azərbaycandakı prezidenti cənab Vudvord demişdir ki, 150 il bundan əvvəl dünya üçün neft sənayesini inkişaf etdirməyə başlamış bir xalq, ölkə, həqiqətən, yenə də bu sahədə əsas rol oynamağa, aparıcı ölkə olmağa layiqdir. Bu gün qarşınızdakı müəssisənin tikilməsi və istismara verilməsi də Azərbaycanın dünya iqtisadiyyatında aparıcı rol oynaması arzusunun reallaşdırılmasını təsdiq edir.
Bizim bəxtimiz gətirib və xoşbəxtik ki, burada, Azərbaycanda belə infrastruktur, yəni, boruörtükləmə zavodu, habelə səriştəli və işgüzar işçi qüvvəsi və bizi dəstəkləyən Dövlət Neft Şirkəti kimi tərəfdaşımız vardır. Əlbəttə ki, Azərbaycanda bizi dəstəkləyən hökumət var. Bunların hamısı öz işimizdə, üzərimizə götürdüyümüz çətin vəzifələri həyata keçirməkdə uğur qazanmağa imkan verir. Mən burada cənab Baş nazirin bizə verdiyi dəstəyi, layihələrin uğurla həyata keçirilməsinə göstərdiyi köməyi xüsusi qeyd etmək istəyirəm. Gələcəkdə də biz onun dəstəyinin davam edəcəyinə əminik. Layihələrimizin gələcəkdə həyata keçirilməsində sizin köməyinizə ümid bağlayırıq.
Cənab Baş nazir!
Hörmətli qonaqlar!
İcazə verin, bugünkü tədbirdə sizinlə birlikdə olmaq üçün məni dəvət etdiyinizə görə bir daha təşəkkürümü bildirim. Eyni zamanda, müəssisənin bütün işçilərinə təşəkkür edim.
Bölmənin digər xəbərləri
