bp XƏZƏR REGİONU ÜÇÜN AZƏRBAYCAN VƏ İNGİLİS DİLLƏRİNDƏ YENİ İNTERNET SAYTI AÇMIŞDIR

27.03.2006 [10:40]
Çap et
A⁺ A^-

AZƏRTAC xəbər verir ki, “Azəri-Çıraq-Günəşli” (AÇG) və “Şahdəniz” yataqlarında hasilatın pay bölgüsü sazişlərinin, Bakı-Tbilisi-Ceyhan neft və Bakı-Tbilisi-Ərzurum qaz ixracı kəmərlərinin operatoru olan bp bu layihələrlə bağlı yeni internet saytı açmışdır. İnternet saytı bp-nin Xəzər regionunda iştirak etdiyi bu layihələr barədə vaxtaşırı geniş məlumatlar təqdim edəcəkdir.

Saytın dizaynını yerli “Ceyhun İmanov studiyası” şirkəti həyata keçirmişdir. Sayt bp-nin Azərbaycan ofisindəki xüsusi qrup tərəfindən idarə olunacaqdır.

Saytda artıq 10 min sənəd - hasilatın pay bölgüsü və tranzit əraziyə malik ölkələrin hökumətləri ilə sazişlər, ətraf mühitə və sosial sahəyə təsirin qiymətləndirilməsi barədə sənədlər və tədbirlər planları, eləcə də müstəqil monitorinqlərin hesabatları, bp-nin Azərbaycan üzrə Davamlı İnkişaf Hesabatı, ictimai sərmayələr və ətraf mühit sərmayələri barədə məlumatlar, yeniliklər, mətbuat üçün açıqlamalar, şəkillər və digər ictimai hesabatlar yerləşdirilmişdir. Bu baxımdan sayt Azərbaycan dilində ən böyük internet saytlarından biridir.

Yeni internet saytının ünvanı belədir: www.bp.com/caspian.