Brüssel Mərkəzi Asiyanın nəqliyyat sektoruna 10 milyard avro sərmayə yatıracaq
Bakı, 3 iyun, AZƏRTAC
Avropa İttifaqı Mərkəzi Asiyada dayanıqlı nəqliyyat əlaqələrinə 10 milyard avro sərmayə yatırmağa hazır olduğunu bəyan edib.
AZƏRTAC xəbər verir ki, bu barədə Avropa İttifaqının Tacikistandakı nümayəndəliyi məlumat yayıb.
“Avropa İttifaqı beynəlxalq tərəfdaşların birgə töhfəsi olaraq, Mərkəzi Asiyada dayanıqlı nəqliyyat əlaqəsinə 10 milyard avro sərmayə yatıracağını elan edib. Avropa Komissiyası Brüsselin “Global Gateway” strategiyası çərçivəsində Transxəzər nəqliyyat dəhlizinə dəstək üçün regional nəqliyyat proqramı hazırlayır”, - deyə məlumatda bildirilir.
Nümayəndəliyin məlumatına görə, Avropa Komissiyasının müşaviri Henrik Hololey “Transxəzər Nəqliyyat Dəhlizi - İpək Yolunun dirçəldilməsi” yüksək səviyyəli missiyası çərçivəsində Tacikistana səfər edib.
Qeyd edək ki, 2024-cü ilin yanvarında Brüsseldə Avropa və Mərkəzi Asiya arasında Dayanıqlı Nəqliyyat Əlaqəsi üzrə İnvestor Forumu keçirilib. Forumda Mərkəzi Asiya regionunun beş ölkəsi nəqliyyat dəhlizlərinin gücləndirilməsinə və bununla da regional əlaqələrin genişləndirilməsinə dair siyasi öhdəliklərini bəyan ediblər.
Bölmənin digər xəbərləri
