SİYASƏT
Brüssel raundu Azərbaycanın Ermənistan üzərində növbəti diplomatik qələbəsi ilə nəticələndi - Politoloq
![Brüssel raundu Azərbaycanın Ermənistan üzərində növbəti diplomatik qələbəsi ilə nəticələndi - Politoloq](/files/2023/2/1200x630/16842302303290922089_1200x630.jpg)
Bakı, 16 may, AZƏRTAC
Azərbaycan və Ermənistan liderləri arasında növbəti üçtərəfli görüş Avropa İttifaqının (Aİ) vasitəçiliyi ilə Brüsseldə baş tutdu. Hazırda Azərbaycanla Ermənistan üç beynəlxalq platformada mütəmadi görüşlər keçirir. Vasitəçilər hər üç siyasi paytaxtda aparılan danışıqları proqressiv və uğurlu adlandırırlar. Formatından asılı olmayaraq, masa üzərində Azərbaycanın tələbləri və ərazi bütövlüyü məsələsi xüsusi olaraq qabardılır. Çünki Azərbaycan tərəfindən irəli sürülən təkliflər beynəlxalq konvensiyalara əsaslanır.
Bu sözləri AZƏRTAC-a açıqlmasında politoloq Tural Əliyev söyləyib.
Azərbaycanın öz hərbi gücü ilə Qarabağı işğaldan azad etməklə regionda yeni reallıq yaratdığını xatırladan politoloq deyib: “Qarabağ tam olaraq Azərbaycanın yurisdiksiyasına daxil olduğu üçün Ermənistanın hüquqi cəhətdən bunu tanımaqdan başqa yolu qalmayıb. Müharibənin yekunu olaraq üçtərəfli Bəyanat imzalandı, Ermənistan isə sənədə əsasən üzərinə bəzi öhdəliklər götürdü. Düşmən ölkə müharibədən ötən müddət ərzində həmin öhdəlikləri yerinə yetirməməkdən ötrü şərti sərhəddə müəyyən təxribatlar törətməklə məşğuldur”.
T.Əliyev qeyd edib ki, ikitərəfli və üçtərəfli formatlarda keçirilən görüşlərdə Ermənistan zəif fiqur kimi görünür. Bunun da ən əsas səbəblərindən biri Ermənistanın vaxtilə apardığı işğal siyasətinin qurbanına çevrilməsidir. Bu baxımdan Brüsseldə iki prinsipial razılaşmada Ermənistan qərarını dəyişə bilmədi. Belə ki, ərazi bütövlüyü və kommunikasiyaların açılması, daha da konkretləşdirsək, Azərbaycanın qərb rayonları ilə Naxçıvanı birləşdirəcək dəmir və avtomobil yolları xətlərinin fəaliyyətinin zəruriliyi bir daha təsdiqləndi. Bu səbəbdən də qeyd etmək olar ki, Brüssel raundu Azərbaycanın Ermənistan üzərində növbəti diplomatik qələbəsi ilə nəticələndi.
O bildirib ki, Azərbaycan postmüharibə dövründə sülhün bərqərar olması üçün qarşıya qoyduğu məqsədlərindən bir addım belə geri çəkilməyib. Bunun əksinə olaraq, Ermənistan danışıqlar prosesinə maneə törətmək üçün müxtəlif təxribatlar törədir, nəticədə isə hər dəfə də eyni reaksiyalarla qarşılaşaraq, ümumi tabloya təsiretmə imkanlarından məhrum olur.
“Ermənistan regionda gedən geosiyasi proseslərdən doğru nəticə çıxarmamaqla yanaşı, zamanın da onların əleyhinə işlədiyini tam olaraq dərk edə bilmir. Zaman baxımından Ermənistan iki seçim qarşısında qalıb - eyforiya, yoxsa reallıq? Keçmiş, yoxsa indiki dövr? Ermənistan bu iki taleyüklü siyasi qərar arasında seçim etməlidir. Əgər bu dövlət keçmiş illərin xiffətini yaşayıb sülhü imitasiya edərək, regionda maraqları olan hansısa güclərin sifarişlərini yerinə yetirməyə davam etsə, siyasi boşluqda qalacaq. İkinci yol isə Ermənistanın yeni reallıqlarla barışıb Cənubi Qafqazda beynəlxalq iqtisadi layihələrin bir parçası olmaqla, bölgənin gələcək inkişafında yer almasıdır. Ermənistan dövləti sülhün alternativinin onlar üçün fəlakət olacağını nə qədər tez dərk etsə, bir o qədər xeyirli olar. Onlar sülh istəməzsə, destruktiv addımlar atarsa, Azərbaycan təkcə Ermənistana deyil, havadarlarına da növbəti məğlubiyyəti yaşadacaq.
“Brüsseldə razılaşdırılan məsələlərin suveren hüquqlar çərçivəsində həllini tapması prosesdə yeni səhifə açmaq istiqamətində mühüm yanaşmadır. Azərbaycanın milli maraqları dövlətlərarası münasibətlərin normallaşması və açılacaq marşrut xətlərinin regionda iqtisadi əlaqələrin formalaşması ilə üst-üstə düşür. Əgər milli maraqlar sülhə, beynəlxalq hüquqi normativlərə və inkişafa söykənirsə, onların reallaşmasına müəyyən amillər yardım edəcək”, - deyə politoloq vurğulayıb.