İsveç Müdafiə Komitəsi Rusiya ilə NATO arasında mümkün hərbi toqquşma riskindən danışıb
Bakı, 12 iyun, AZƏRTAC
İsveçin Müdafiə Komitəsi hazırladığı hesabatda Rusiya ilə NATO arasında hərbi qarşıdurmanın nisbətən yaxın zamanda baş verə biləcəyi ehtimalının nəzərə alınmasını təklif edib.
AZƏRTAC xəbər verir ki, bu barədə krallığın müdafiə siyasətinin gələcək istiqamətlərini müəyyənləşdirən sənəddə bildirilir. Qeyd olunur ki, belə bir ssenarinin reallaşması Moskva üçün əlverişli siyasi şəraitin formalaşmasından asılı ola bilər. Hesabatda, həmçinin İsveçin təhlükəsizlik mühitinin pisləşdiyi və Rusiyanın Baltik dənizi ətrafında hərbi mövcudluğunu artırdığı iddia olunur. Komitənin qənaətinə görə, ABŞ ilə münasibətlər strateji əhəmiyyətini qoruyub saxlasa da, Avropa müdafiə sahəsində məsuliyyətini artırmalıdır.
Sənəddə ABŞ-nin hazırkı administrasiya dövründə xarici siyasət və təhlükəsizlik kursunun daha dəyişkən, sərt ritorikaya əsaslanan və hərbi gücdən istifadəyə meylli olduğu qeyd edilir.
Komitə üzvləri həm hərbi sahədə, həm də mülki müdafiə istiqamətində yenidən silahlanma prosesinin sürətləndirilməsinin vacibliyini vurğulayıblar. Həmçinin yaxın illərdə kadr təyinatı, texnika və infrastrukturla bağlı qərarların operativliyinin müdafiə potensialının gücləndirilməsi baxımından mühüm əhəmiyyət daşıdığı bildirilib.
Bölmənin digər xəbərləri
