Türk siyasi şərhçi: Şuşa Bəyannaməsi ortaq geosiyasi baxışı hüquqi müstəviyə daşıyıb
Bakı, 12 iyun, AZƏRTAC
Şuşa Bəyannaməsinin 2021-ci il iyunun 15-də imzalanmasından sonra Türkiyə ilə Azərbaycan arasında münasibətlər strateji tərəfdaşlıq səviyyəsindən müttəfiqlik səviyyəsinə yüksəlib və iki ölkə arasında əməkdaşlıq daha institusional xarakter alıb. Bu proses Türkiyə-Azərbaycan münasibətlərinin bütün istiqamətlər üzrə daha da dərinləşməsinə və qarşılıqlı fəaliyyət mexanizmlərinin güclənməsinə şərait yaradıb.
AZƏRTAC xəbər verir ki, bu fikirləri türk siyasi şərhçi Umur Tuqay Yücel bildirib.
Onun sözlərinə görə, xüsusilə müdafiə və təhlükəsizlik sahələrində birgə hərbi təlimlərin intensivləşdirilməsi, müdafiə sənayesi üzrə əməkdaşlığın genişləndirilməsi və təhlükəsizlik məsələlərində daha sıx koordinasiyanın təmin olunması Türkiyə-Azərbaycan müttəfiqliyinin ən mühüm nəticələrindən biridir. Bu proses, eyni zamanda, iki ölkənin regional və beynəlxalq məsələlərdə ortaq mövqedən çıxış etmək imkanlarını daha da gücləndirib. Şuşa Bəyannaməsinin mühüm nəticələrindən biri də enerji və nəqliyyat sahələrində mövcud əməkdaşlığın yeni mərhələyə keçməsi olub. Türkiyə ilə Azərbaycan arasında enerji təchizatı təhlükəsizliyini dəstəkləyən layihələr strateji əhəmiyyət qazanıb, regional nəqliyyat şəbəkələrinin inkişafına yönəlmiş təşəbbüslərin həyata keçirilməsi isə sürətlənib.
“Bəyannamə Türk dünyasında əməkdaşlığın güclənməsinə də mühüm töhfə verib. Sənəd Türk Dövlətləri Təşkilatı çərçivəsində həyata keçirilən birgə fəaliyyətlərin genişlənməsini və üzv dövlətlər arasında əməkdaşlığın daha da dərinləşməsini təşviq edib. Cənubi Qafqazın təhlükəsizlik arxitekturası baxımından Şuşa Bəyannaməsi regionda yeni güc balansının formalaşmasına əhəmiyyətli təsir göstərib. Azərbaycanın 2020-ci ildə əldə etdiyi tarixi Zəfərdən sonra yaranan yeni geosiyasi reallıqlar Türkiyənin regionda artan rolu ilə birlikdə daha aydın şəkildə özünü göstərməyə başlayıb”, - deyə Umur Tuqay Yücel vurğulayıb.
O deyib ki, Bəyannamə iki ölkə arasında strateji həmrəyliyi daha da gücləndirərək regional təhlükəsizlik baxımından mühüm çəkindirici amilə çevrilib. Şuşa Bəyannaməsi yalnız Türkiyə ilə Azərbaycan arasında müttəfiqlik münasibətlərini möhkəmləndirən sənəd deyil. Bu sənəd, eyni zamanda, Cənubi Qafqazın yeni siyasi, iqtisadi və təhlükəsizlik düzəninin formalaşmasında mühüm rol oynayan strateji yol xəritəsi xarakteri daşıyır.
Siyasi şərhçinin sözlərinə görə, Şuşa Bəyannaməsi regional sabitliyin möhkəmləndirilməsi, əməkdaşlıq imkanlarının genişləndirilməsi və uzunmüddətli inkişaf perspektivlərinin təmin olunması baxımından tarixi əhəmiyyətə malik sənəd kimi qiymətləndirilməlidir.
Müxbir - Səbinə Əlizadə
Bölmənin digər xəbərləri
