“Caspian Energy Club”un Qara dəniz nümayəndəliyi yaradılacaq
Bakı, 18 yanvar, AZƏRTAC
“Caspian Energy Club”un Qara dəniz nümayəndəliyini “Caspian Energy Turkey” idarə edəcək. Bu layihənin həyata keçirilməsi məqsədilə “Caspian Energy Club” “Caspian Energy Turkey”də pay iştirakını satışa çıxarıb. Qara Dəniz nümayəndəliyinin və “Caspian Energy Turkey”in Baş icraçı direktoru Avni Dəmirçi təyin olunub.
Bu barədə AZƏRTAC-a “Caspian Energy Club” qrupunun sədri və baş icraçı direktoru Telman Əliyev məlumat verib.
T.Əliyev bildirib ki, 5 il ərzində “Caspian Energy Turkey” ilə Rumıniya, Bolqarıstan, Ukrayna və Moldovada daimi nümayəndəlik yaradılacaq. Həmçinin “Caspian Energy Turkey” “Caspian Energy Georgia”da pay iştirakının sahibi olacaq. Pay iştirakının satışı barədə təkliflər paketi çərçivəsində “Caspian Energy Turkey” türk və ingilis dillərində eyniadlı jurnal nəşr etmək hüququ əldə edir. Eyni zamanda, “Caspian Energy TV”, “Caspian Energy Photo”, “Caspian Energy News”, “Caspian Energy Investor”, “Caspian Energy Jobs” və “Caspian Energy Info” layihələrinə tam və qismən inteqrasiya da nəzərdə tutulub. “Caspian Energy Turkey” ildə iki dəfə beynəlxalq “Caspian Energy Forum” (Ankara və İstanbulda) və ildə bir dəfə “Caspian Energy Award Turkey”, “Caspian Business Award Turkey”, “Brand Award Turkey” beynəlxalq mükafatlarının təqdimetmə mərasimini təşkil edəcək. Bununla yanaşı, hər ay Türkiyənin müxtəlif regionlarında Xəzər-Qara dəniz və Baltik regionu ölkələrinin şirkət top-menecerlərinin və dövlət qurumlarının nümayəndələrinin iştirakı ilə B2G, B2B və B2C formatlarında forum və müxtəlif tədbirlər keçiriləcək. “Business Tour” layihəsi çərçivəsində sahibkarlar Türkiyənin müxtəlif region və müəssisələrinə şəxsən baş çəkmək və onların investisiya imkanları ilə tanış olmaq imkanı əldə edəcəklər. Analoji fəaliyyət gələcəkdə Rumıniya, Bolqarıstan, Ukrayna, Gürcüstan və Moldovada da təşkil olunacaq.
1999-cu il mayın 28-dən fəaliyyət göstərən “Caspian Energy” beynəlxalq jurnalı 50 ölkədə yayılır. “Caspian Energy” ticarət markası Azərbaycan, Böyük Britaniya, Gürcüstan, İran, Qazaxıstan, Rusiya, Türkiyə, Türkmənistan, Ukrayna və Avropa İttifaqının 27 ölkəsində qeydiyyatdan keçib. 20 il ərzində jurnalda dünyanın müxtəlif ölkələrinin prezident və Baş nazirlərinin, həmçinin nüfuzlu beynəlxalq təşkilat və nəhəng transmilli şirkət rəhbərlərinin müsahibələri, aparıcı ekspertlərin icmal və analitik materialları dərc olunub. Müxtəlif qiymətləndirmələrə görə, “Caspian Energy” jurnalı Xəzər-Qara dəniz və Baltik regionlarının aparıcı nəşrləri beşliyinə daxil olub, həmin regionlarda fəaliyyətin müəyyən edilməsində əksər sərmayəçilər üçün istiqamətləndirici rol oynayır.
Sıralarında 50 ölkədən 5 mindən çox şirkət və təşkilatı birləşdirən “Caspian Energy Club” 2002-ci ilin iyununda yaradılıb. Biznes-hökumət dialoqunun fəal iştirakçısı olan “Caspian Energy Club”un əsas məqsədi Azərbaycanda və “Caspian Energy Club”un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir. Biznes-netvorkinq üçün beynəlxalq platforma olan “Caspian Energy Club” mütəmadi şəkildə müxtəlif tədbirlər təşkil edir. Mənzil-qərargahı Bakı şəhərində yerləşən “Caspian Energy Club”un Gürcüstan və Qazaxıstanda rəsmi nümayəndəlikləri, həmçinin dünyanın müxtəlif ölkələrində səlahiyyətli nümayəndələri var.
Bölmənin digər xəbərləri
