Bakı, 17 iyul, AZƏRTAC

“Caspian European Club”un Sumqayıt Şəhər İcra Hakimiyyətinin başçısı Zakir Fərəcovun iştirakı ilə “B2G Online” forumu keçirilib.

Bu barədə AZƏRTAC-a “Caspian European Club” və “Caspian Energy” qrupunun sədri və baş icraçı direktoru Telman Əliyev məlumat verib.

O deyib ki, forumun başlanğıcında Tovuz rayonu ilə sərhəd zonasında erməni hərbi qruplaşmaları ilə döyüşdə həlak olmuş hərbçilərimizin xatirəsi bir dəqiqəlik sükutla yad edilib. Üç saat davam edən forumda koronavirus pandemiyasının Sumqayıt sahibkarlarına və sakinlərinə verdiyi zərərin azaldılması üçün sahibkarların və icra hakimiyyətinin birgə fəaliyyətinin planlaşdırılması, sahibkarların problemlərinin müzakirəsi və həlli yollarının axtarılması, “Caspian European Club” ilə gələcəkdə əməkdaşlıq formatının müəyyən edilməsi məsələləri müzakirə olunub.

Forum çərçivəsində sahibkarların COVID-19 pandemiyası dövründə qarşılaşdıqları məsələlər müzakirə edilib. Onlayn “B2G” forumunun mövzularından biri də “Caspian European Club”un üzv şirkətlərinin Sumqayıt şəhərində əməkdaşlıq və investisiyalaşma imkanlarının öyrənilməsi olub.

Z.Fərəcov deyib: “Həlak olan general-mayor Polad Həşimov 1975-ci ildə Qəbələdə doğulub. Heydər Əliyev adına ali məktəbdə təhsil alıb və təhsilini Türkiyədə davam etdirib. Sumqayıtda yüzlərlə vətəndaş onun evinin önünə toplaşıb və onun nəşini qarşılayıb, ailə üzvlərinə başsağlığı veriblər. Mən də anası ilə görüşüb başsağlığı verdim”.

Sumqayıtda aparılmış abadlıq-quruculuq işləri ilə bağlı videoçarxın nümayişindən sonra Z.Fərəcov bildirib ki, son illər Azərbaycan Prezidentinin göstərişlərinə uyğun olaraq Sumqayıtda abadlıq-quruculuq işləri yerinə yetirilib. Ümumi sahəsi 106 hektar, uzunluğu 4,2 kilometr olan Yeni Sumqayıt Bulvarı salınıb. Çox qısa müddətdə tikilmiş Bulvarı Azərbaycan Prezidenti “möcüzə” adlandırıb. Bu bulvar sumqayıtlıların çox sevdiyi istirahət məkanına çevrilib. Sumqayıtda yeni Heydər Əliyev Mərkəzi, İncəsənət məktəbi, Şahmat məktəbi, Yeni Azərbaycan Partiyasının yeni inzibati binası, Bayraq Muzeyi, Muğam evi, Nizami kinoteatr evi və sair yeni tikililər tikilib, 263 çoxmənzilli binanın dam örtüyü dəyişdirilib. Şəhərin yolları asfaltlanıb, yol kənarlarında abadlıq işləri aparılıb. Bu işlərə bir çox Sumqayıt sahibkarları maliyyə və texniki dəstək göstəriblər.

Qeyd edilib ki, Sumqayıt Şəhər İcra Hakimiyyəti sahibkarların işlərinə əsassız müdaxilənin qarşısının alınması üçün ciddi tədbirlər həyata keçirib. Hüquq-mühafizə orqanları sahibkarlarla ciddi əməkdaşlıq edir.

“Bu forumdan istifadə edərək “Caspian European Club” üzvlərini Sumqayıt şəhərində iş qurmağa dəvət edirəm. Sumqayıtda istehsal sexləri yaradılması üçün icra hakimiyyəti sahibkarlara dəstək vermək niyyətindədir. Sumqayıt Şəhər İcra Hakimiyyəti koronavirusla mübarizədə ciddi tədbirlər həyata keçirir. Dezinfeksiya işləri mütəmadi aparılır, Sumqayıtda 1 saylı xəstəxana koronavirus xəstələrinin müalicəsi üçün ayrılıb və müvafiq avadanlıqlarla təchiz edilib, bir modul tipli xəstəxana tikilib istifadəyə verilib. Əhali maskalar və mühafizə vasitələri ilə təmin edilib. “Evdə qal” kampaniyasına dəstək üçün Sumqayıt Şəhər İcra Hakimiyyəti və Heydər Əliyev Fondunun təşkilatçılığı ilə ehtiyacı olan Sumqayıt şəhər sakinlərinə 400 min manat dəyərində ərzaq paketi paylanılıb”, - deyə icra başçısı bildirib.

Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili qeyd edib ki, klubun onlayn tədbirinə qatılması ilk deyil və “Caspian European Club” tərəfindən yaradılmış platformada dövlət sektoru ilə biznes nümayəndələri arasındakı dialoqu olduqca vacib hesab edir.

O bildirib ki, tenderlərin şəffaf keçirilməsi, yüksək maddi texniki bazaya, kadr potensialına, uyğun təcrübəyə malik yerli şirkətlərin tenderdə qalib ola bilməsi üçün tender haqqında qanuna Milli Məclisdə dəyişikliklər hazırlanır: “Məqsəd odur ki, tenderin qalibi yalnız qiymət meyarları ilə deyil, digər meyarlar ilə də seçilsin. Milli Məclisdə Sumqayıtla bağlı layihələrə mən və burada iştirak edən həmkarım Müşviq Məmmədli ilə ciddi dəstək veririk”.

Forumun moderatoru “Caspian European Club”un Sumqayıt filialının rəhbəri Məmmədov Şahin deyib ki, Sumqayıt sahibkarları koronavirusla mübarizəyə dəstək fonduna 300 min manata yaxın pul köçürüb. Qartal Tikinti Firması Sumqayıt Şəhər Təcili Tibbi yardım maşınlarına və Təcili Tibbi yardım stansiyalarına bütün respublikanı əhatə edən şifrəli tetra telekommunikasiya şəbəkəsinə qoşulmuş stasionar ratsiyalar quraşdırıb. Həmçinin koronavirus xəstələri müalicə olunan Sumqayıt şəhər 1 saylı xəstəxanada Rusiyadan gəlmiş həkimlərin bir-biri ilə operativ əlaqə saxlaması üçün xəstəxanaya 12 ədəd ratsiya verib. Bütün bu işləri Qartal Tikinti Firması öz maliyyə vəsaiti hesabına yerinə yetirib. Digər sahibkarlar da koronavirus xəstəliyinin qarşısının alınması üçün şəhərə müxtəlif köməkliklər göstərib və gələcəkdə də müxtəlif aksiyalar keçirməyi planlaşdırırlar.

Ş.Məmmədov qeyd edib ki, sahibkarlar Sumqayıt şəhərində fəaliyyət göstərən tikinti-quraşdırma şirkətləri Sumqayıtda dövlət vəsaiti hesabına yerinə yetirilən işlərdən iş sifarişi almalarını istəyirlər. Sumqayıt şəhərində sahibkarları narahat edən digər məsələləri də bildirib və Z.Fərəcov bu məsələlərə aydınlıq gətirib. Sonra icra başçısı “Caspian European Club”un ayrı-ayrı üzvlərinin suallarını cavablandırıb və onlara köməklik edəcəyini deyib.

“Caspian European Club”un sədri və baş icraçı direktoru T.Əliyev açıq dialoqa görə klubun üzv şirkətlərinin top-menecerləri adından Z.Fərəcova minnətdarlığını bildirib, “Caspian European Club”la sahibkarların təkliflərini operativ öyrənmək və onları Sumqayıt Şəhər İcra Hakimiyyətinin rəhbərliyinə çatdırmaq imkanı qazandıracaq ikitərəfli işçi qrup yaratmağı təklif edib. Z.Fərəcov sahibkarlarla hər zaman dialoqa hazır olduğunu bildirib.

Dövlət və özəl sektor arasında dialoqun aktivləşməsi üçün mühüm vasitə olan “B2G Online” “Caspian European Club” tərəfindən Azərbaycan, Gürcüstan və Qazaxıstanda hər həftə təşkil olunur. Sıralarında dünyanın 50 ölkəsindən 5 mindən çox şirkət və təşkilatı birləşdirən “Caspian European Club” 2002-ci ilin iyununda yaradılıb. “Biznez-hökumət” dialoqunun fəal iştirakçısı olan “Caspian European Club”un əsas məqsədi Azərbaycanda və “Caspian European Club”un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin “B2G”, “B2B” və “B2C” formatlarında dialoqların stimullaşdırılması və onlarda iştirak etməkdən ibarətdir.

Biznes-netvorkinq üçün beynəlxalq platforma olan “Caspian European Club” mütəmadi olaraq “CEO Brunch”, “CEO Lunch”, “Business Tour” və sair kimi müxtəlif tədbirlər təşkil edir. Onlayn biznes-treninqlər çərçivəsində yerli və xarici mütəxəssislər tərəfindən vebinar, treninq və seminarlar keçirilir. “Caspian European Club”un mənzil-qərargahı Bakıda yerləşir. Klubun Gürcüstan və Qazaxıstanda rəsmi nümayəndəlikləri, həmçinin ABŞ, Almaniya, Polşa, Latviya və Çexiyada səlahiyyətli nümayəndələri var.