Cəbrayıl Rayon Polis Şöbəsinin əməkdaşları üç kiloqramdan çox narkotik vasitəni qanunsuz dövriyyədən çıxarıblar
Bakı, 28 avqust, AZƏRTAC
Cəbrayıl Rayon Polis Şöbəsi əməkdaşlarının keçirdikləri əməliyyat-axtarış tədbirləri nəticəsində 3 kiloqramdan artıq narkotik vasitə aşkarlanaraq qanunsuz dövriyyədən çıxarılıb.
Daxili İşlər Nazirliyinin mətbuat xidmətindən AZƏRTAC-a bildiriblər ki, rayon polis şöbəsi əməkdaşlarının daxil olmuş məlumat əsasında keçirdikləri əməliyyat tədbirləri nəticəsində İmişli şəhər sakini N.Fəttahlının idarə etdiyi “VAZ 21093” markalı avtomobil saxlanılıb. Həmin avtomobilin sərnişini K.Məhərrəmovun əl çantasına baxış zamanı oradan 3 kiloqramdan artıq heroin aşkarlanaraq götürülüb. İlkin araşdırma zamanı K.Məhərrəmovun həmin narkotik vasitəni Nadir adlı İran vətəndaşının vasitəsilə əldə etdiyi müəyyən olunub.
Faktla bağlı Cəbrayıl Rayon Polis Şöbəsində araşdırma aparılır.
Bölmənin digər xəbərləri
