CƏLİLABAD İCTİMAİYYƏTİ 20 YANVAR ŞƏHİDLƏRİNİNXATİRƏSİNİ EHTİRAMLA YAD ETMİŞDİR
Rayonun rəhbər işçiləri, ağsaqqallar, müharibə veteranları və gənclərin nümayəndələri şəhərin Şəhidlər xiyabanına gələrək Vətənimizin azadlığı və ərazi bütövlüyü uğrunda mübarizədə həlak olanların şərəfinə ucaldılan abidənin önünə gül-çiçək dəstələri düzmüş, istiqlal mücahidlərinin ruhuna dualar oxunmuşdur.
Mərasim iştirakçıları şəhərin mərkəzi meydanında ümummilli liderimiz Heydər Əliyevin abidəsini də ziyarət etmiş, ulu öndərə məhəbbət və ehtiramlarını bildirmişlər.
Həmin gün Cəlilabad şəhərindəki “Lalə” sarayında 20 Yanvar şəhidlərinin şərəfinə ehsan verilmiş, şəhid ailələrinə, Qarabağ müharibəsi veteranlarına maddi yardımlar edilmişdir.
Tədbirdə rayon mədəniyyət evinin bədii özfəaliyyət kollektivləri 20 Yanvar faciəsi ilə əlaqədar ədəbi-bədii kompozisiya nümayiş etdirmişlər.
