CƏLİLABAD VƏ ƏLİ BAYRAMLI ŞƏHƏRLƏRİNDƏ PROKURORLUQ İŞÇİLƏRİNİN ZONA MÜŞAVİRƏLƏRİ KEÇİRİLMİŞDİR
Bölgələr üzrə 14 şəhər və rayon prokurorluğu əməkdaşlarının iştirakı ilə keçirilən müşavirələrdə ayrı-ayrı şəhər və rayon prokurorlarının, prokurorluq işçilərinin hesabatları dinlənilməklə, 2004-cü ilin ötən dövrü ərzində qanunçuluğun daha da möhkəmləndirilməsi, dövlətçiliyimizin maraqlarının və insan hüquq və azadlıqlarının müdafiəsi, cinayətkarlıq və hüquq pozuntularına qarşı mübarizə işinin real vəziyyəti, mövcud nöqsanların və çatışmazlıqların yaranma səbəbləri hərtərəfli və prinsipial təhlil edilmiş, “Prokurorluq haqqında” Qanunda nəzərdə tutulmuş fəaliyyət istiqamətləri, o cümlədən istintaq, dövlət ittihamının müdafiəsi və vətəndaşların müraciətlərinə baxılması üzrə işin səmərəliliyinin artırılması, prokurorluq orqanlarında xidməti, icra və əmək intizamının, məsuliyyətin daha da yüksəldilməsi üçün konkret tədbirlər müəyyənləşdirilmişdir.
Əməliyyat müşavirələrində məruzə ilə çıxış edən baş prokuror Zakir Qaralov hesabat dövründə əldə edilmiş müsbət iş göstəricilərini qeyd etməklə yanaşı, bir sıra ərazi vahidləri üzrə ümumi cinayətlərin sayının artmasını, cinayətkar hərəkətlər nəticəsində fiziki və hüquqi şəxslərə vurulmuş maddi zərərlərin tam ödənilməməsini, vətəndaşların müraciətlərinə baxılması və onların qəbulunun təşkili sahəsində ayrı-ayrı tabe prokurorların işində mövcud olan çatışmazlıqları, əməkdaşlar tərəfindən xidməti və icra intizamının pozuntusu hallarını tənqid etməklə, bu istiqamətlərdə prokurorluq orqanlarının fəaliyyətinin səmərə və kəsərliliyinin daha da yüksəldilməsi, o cümlədən respublikamızın cənub bölgəsində narkotik vasitələrin qanunsuz dövriyyəsinə qarşı və qaçaqmalçılıq cinayətləri ilə mübarizənin gücləndirilməsi məsələlərini vacib vəzifə kimi qarşıya qoymuşdur.
Ötən altı ayda digər hüquq mühafizə orqanları ilə qarşılıqlı əlaqədə cinayətkarlığa qarşı mübarizə sahəsində əldə edilmiş və ölkədə kriminogen durumun sabitləşməsi ilə nəticələnən nailiyyətlərin xalqımızın ümummilli lideri Heydər Əliyev tərəfindən əsası qoyulmuş və onun layiqli davamçısı Azərbaycan Prezidenti İlham Əliyev tərəfindən uğurla davam etdirilən dövlətçilik siyasətinin məntiqi nəticəsi olduğu diqqətə çatdırılmışdır.
Xüsusi olaraq vurğulanmışdır ki, bütün tabe prokurorlar və hər bir prokurorluq əməkdaşı öz səlahiyyətləri çərçivəsində Azərbaycan Prezidentinin “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” 24 noyabr 2003-cü il tarixli fərmanından irəli gələn vəzifələrin həyata keçirilməsində fəal iştirak etməli, prokurorluq orqanlarının fəaliyyəti, ilk növbədə, vətəndaşların müraciətlərinə hərtərəfli və obyektiv baxılmasının təmin edilməsinə, onların qəbulu işinin düzgün təşkili məsələlərinə istiqamətləndirilməlidir.
Baş prokuror Əli Bayramlı və Cəlilabad şəhərlərində vətəndaşların qəbulunu keçirməklə, onların müraciətlərində qaldırılan məsələlərin operativ və qanuni həlli üçün müvafiq göstərişlər vermişdir.
Eyni zamanda, Cəlilabad rayonunun Göytəpə qəsəbəsində yerləşən peşə litseyində və Əli Bayramlı şəhəri telemexanika zavodunun yataqxanasında məskunlaşmış qaçqın və məcburi köçkünlərlə görüşlər keçirilmiş, Ermənistan-Azərbaycan, Dağlıq Qarabağ probleminin sülh yolu ilə həlli istiqamətində, habelə qaçqın və məcburi köçkünlərin yaşayış şəraitlərinin yaxşılaşdırılması istiqamətində ölkəmizin Prezidenti İlham Əliyev tərəfindən görülən tədbirlər barədə onlara ətraflı məlumat verilmişdir. Dövlət səviyyəsində göstərilən qayğı və diqqətə görə minnətdarlıqlarını ifadə edən qaçqın və məcburi köçkünlərin nümayəndələri işğal altındakı torpaqlarımızın sülh yolu ilə azad edilməsi, ölkəmizin sosial-iqtisadi inkişafı istiqamətində Prezidentimizin fəaliyyətini yekdilliklə dəstəklədiklərini bildirmişlər.
Bölmənin digər xəbərləri
