CƏMŞİD NAXÇIVANSKİ ADINA HƏRBİ LİTSEYİN KURSANTI EMİN BAYRAMOVUN ÇIXIŞI
-Möhtərəm Prezident!
Cənab Ali Baş Komandan!
Hörmətli mərasim iştirakçıları!
Bu gün biz - gənc naxçıvanskilərin həyatında əlamətdar bir gündür. Kursantı olduğum Cəmşid Naxçıvanski adına hərbi litseyin 30 illik yubileyi Azərbaycan Respublikası Prezidentinin sərəncamı ilə ümumxalq bayramı kimi qeyd olunur. Bu tədris ocağı xalqımıza yüzlərlə peşəkar hərbçi vermişdir. Onların arasında Milli Qəhrəmanlar, yüksək rütbəli zabitlər, generallar da vardır.
Hazırda hərbi litseydə təhsil alan kursantların demək olar ki, hamısı Azərbaycanın müstəqilliyi dövründə boya-başa çatan nəslə mənsubdur. Bu baxımdan biz xoşbəxt nəsilik. Ölkəmizin, xalqımızın keçdiyi keşməkeşli yol, yaxın keçmişimiz haqqında məlumatı böyüklərdən, müəllimlərdən, kitablardan alırıq. Biz gözlərimizi həyata açandan bəri ən çox eşitdiyimiz bir söz - “Qarabağ” sözü, bəlkə də bizim formalaşmağımızda mühüm rol oynamış amillərdən olmuşdur. Həyatı dərk etməyə başlayandan anladıq ki, bu, xalqımızın indiki dövrdə ən ağrılı-acılı problemidir və hər bir azərbaycanlı bu problemin həll olunması üçün əlindən gələni etməlidir. Doqquz ildir ki, Dağlıq Qarabağda gedən hərbi əməliyyatlar dayandırılıb, atəşkəs elan edilib, Ermənistan-Azərbaycan, Dağlıq Qarabağ münaqişəsinin dinc yolla həll edilməsi üçün səylər göstərilir. Lakin problem hələ də həll olunmamış qalır, bizim torpaqlarımız işğal altındadır, vətəndaşlarımız qaçqın və köçkün vəziyyətindədir.
Belə bir dövrdə hərbçi ixtisasını seçmək xüsusilə şərəflidir. Mən də öz arzumla, valideynlərimin razılığı ilə bu sənəti seçdim. Mən Vətənimin çağırışı ilə onun ərazi bütövlüyünün tam bərpa edilib qorunması, müstəqilliyinin möhkəmləndirilməsi üçün Ali Baş Komandanın əmrlərini ləyaqətlə yerinə yetirə bilən hərbçi olmaq istəyirəm və söz verirəm ki, bu yolda var-qüvvəmi sərf edəcəyəm.
İki gün bundan əvvəl Siz bizim litseyimizdə olarkən, möhtərəm cənab Ali Baş Komandan, özünüz əyani surətdə şəraitimizlə tanış oldunuz. Belə gözəl bir şəraitdə Sizin gələcək sədaqətli əsgərləriniz olmaq üçün bizim hər cür imkanımız vardır. Son bir il ərzində litseydə aparılan genişmiqyaslı təmir-tikinti işləri cənab Ali Baş Komandanın bizə göstərdiyi xüsusi diqqət və qayğısının təzahürüdür.
Əmin ola bilərsiniz ki, bizim ulu əcdadlarımızın döyüş rəşadəti, Vətənimizin ərazi bütövlüyü və müstəqilliyi uğrunda canlarını fəda etmiş soydaşlarımızın əziz xatirəsi, cənab Ali Baş Komandan, Sizin bizə etdiyiniz tövsiyələr daim qəlbimizdə yaşayır və bu, bizi Vətənin sadiq əsgərləri olmağa ruhlandırır. Cənab Ali Baş Komandan, Sizin hər bir əmrinizi yerinə yetirməyə qadir olan Azərbaycan əsgəri olmağa söz veririk.
Diqqətinizə görə sağ olun!
Bölmənin digər xəbərləri
