Cənubi Koreya Yaxın Şərq ölkələrindəki vətəndaşlarını təxliyə etməyə çalışır
Pekin, 3 mart, AZƏRTAC
Yaxın Şərqdə artan gərginliklə əlaqədar Cənubi Koreyanın təxminən 21 min vətəndaşı regionun 13 ölkəsində qalıb.
AZƏRTAC Koreya mediasına istinadla xəbər verir ki, bu barədə hakim Koreya Demokrat Partiyasından olan deputat Kim Yonq Be Milli Assambleyada hökumət rəsmiləri ilə keçirilən görüşdən sonra keçirilən brifinqdə bildirib.
O, səlahiyyətli qurumların Yaxın Şərqdə qalan koreyalıların vətənə qayıtmasını və digər ölkələrə təxliyəsini təmin etmək üçün müxtəlif kanallarla əlaqə saxladığını deyib.
"Vəziyyətin nə qədər davam edəcəyini qiymətləndirmək çətindir, ona görə də əvvəlcə təxliyəsi vacib olanların sayını müəyyənləşdiririk", - deyən deputat əlavə edib ki, onların hava məkanı açıq qalan ölkələrə köçürülməsi yolları nəzərdən keçirilir. Ən çox koreyalı Birləşmiş Ərəb Əmirliklərində, xüsusilə Dubaydadır.
Cənubi Koreya hökuməti, həmçinin Hörmüz boğazının bağlanmasından sonra Yaxın Şərq xaricindən neft tədarükünün təmin edilməsi üçün səylər göstərir. Hazırda Yaxın Şərqdə təxminən 30 Koreya xam neft tankeri və ticarət gəmisi var.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
