CƏMİYYƏT
CƏNUBİ QAFQAZDA SU PROBLEMLƏRİNƏ DAİR BEYNƏLXALQ KONFRANS
Aprelin 15-də Bakıda “ATƏT kontekstində sudan məqbul istifadə və onun keyfiyyətinin qorunması üçün əməkdaşlıq” mövzusunda ATƏT-in 10-cu iqtisadi forumunun 3-cü hazırlıq seminarı işə başlamışdır. Tədbiri ATƏT-in iqtisadiyyat və ətraf mühit məsələləri üzrə əlaqələndiricisinin ofisi bu təşkilatın Bakı ofisi ilə əməkdaşlıq şəraitində və xarici işlər, ekologiya və təbii sərvətlər nazirliklərinin, Dövlət Meliorasiya və Su Təsərrüfatı Komitəsinin köməyi ilə təşkil etmişdir. Seminara ATƏT-in üzvü olan 55 dövlətin 100-dən çox nümayəndəsi toplaşmışdır.
ATƏT-in iqtitsadiyyat və ətraf mühit məsələləri üzrə əlaqələndiricisi Martsin Şviyetski seminarın açılışında bildirmişdir ki, bu tədbir Cənubi Qafqazda su problemlərinə, o cümlədən suyun keyfiyyətinin qorunması, su ehtiyatlarından istifadə sahəsində regional əməkdaşlıq, dövlətlərarası su komissiyaları regional əməkdaşlıq vasitəsi kimi, ümumi su hövzələrində əməkdaşlığın genişləndirilməsində qeyri-hökumət təşkilatlarının rolu mövzularına həsr olunmuşdur. Birinci və ikinci hazırlıq seminarları Belqradda və Madriddə keçirilmişdir. Təşkilatçıların fikrincə, ATƏT-in 2002-ci ilin mayında Praqada keçiriləcək iqtisadi forumunun üçüncü və yekun hazırlıq seminarının təşkili üçün Bakının seçilməsi ATƏT-in Cənubi Qafqazda su problemlərinə necə böyük əhəmiyyət verdiyini göstərir. İqtisadi forumda diskussiyaların əsasını Bakı seminarının ideyaları təşkil edəcəkdir.
Seminarda qeyd olunmuşdur ki, su ehtiyatları problemi dünyada ən aktual problemlərdən biridir. Hazırda dünyada 1 milyarddan çox insan içməli su sarıdan korluq çəkir, 2025-ci ilədək Yer kürəsi əhalisinin üçdə bir hissəsi su ehtiyatlarının qıtlığı ilə üzləşəcəkdir.
Dövlət Meliorasiya və Su Təsərrüfatı Komitəsi sədrinin birinci müavini Nadim Qazıbəyov vurğulamışdır ki, Cənubi Qafqaz ölkələrində əsas su mənbəyi olan Kür çayı qonşu dövlətlərin ərazisindən keçdikdən sonra Azərbaycana artıq çirklənmiş halda gəlir və bu, əhalinin sağlamlığı üçün böyük təhlükə törədir. O, donor ölkələri və beynəlxalq təşkilatları Kür çayında ekoloji vəziyyətin yaxşılaşmasına yardım göstərməyə çağırmışdır.
Sonra seminar işçi qruplarda işini davam etmişdir.