Çaqos adaları ilə bağlı razılaşma üzrə danışıqlar məhkəmə qərarı ilə dayandırılıb
London, 22 may, AZƏRTAC
Böyük Britaniya hökuməti Çaqos adaları ilə bağlı razılaşma üzrə danışıqları müvəqqəti olaraq dayandırıb.
AZƏRTAC BBC-yə istinadla xəbər verir ki, bu qərar son dəqiqədə Ali Məhkəmə hakimi tərəfindən çıxarılıb. Hakim Custus Qus tərəfindən yerli vaxtla saat 02:25-də verilən qərara əsasən, çaqoslu vətəndaş Bertris Pompe tərəfindən Xarici İşlər Nazirliyinə qarşı qaldırılan iddia üzrə müvəqqəti hüquqi müdafiə tədbiri tətbiq olunub.
Qərarda bildirilir: “Cavabdeh, yəni Böyük Britaniyanın Xarici İşlər Nazirliyi, Britaniya Hind Okeanı Ərazisinin, digər adı ilə Çaqos arxipelaqının xarici hökumətə mümkün şəkildə verilməsi və ya bu transferin konkret şərtləri ilə bağlı hüquqi öhdəlik götürmək istiqamətində heç bir qəti və hüquqi baxımdan bağlayıcı addım atmamalıdır”,- deyə qeyd olunub.
Məhkəmə bu gün yerli vaxtla saat 10:30-da işə yenidən baxacaq.
Qeyd edək ki, Çaqos adaları Hind okeanında yerləşir və strateji baxımdan əhəmiyyətli ərazidir. Hazırda adalar qrupuna daxil olan tropik Dieqo Qarsiya adasında ABŞ və Böyük Britaniyanın birgə hərbi bazası yerləşir. Ötən ay ABŞ Prezidenti Donald Tramp Böyük Britaniyanın Çaqos adalarını Mavrikiyə təhvil vermək barədə razılaşmasına təsdiq vermişdi.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
