Çexiyanın ali məktəblərində təhlükəsizlik tədbirləri gücləndiriləcək
Praqa, 27 dekabr, AZƏRTAC
Çexiyada ali məktəblərin rektorları və Təhsil Nazirliyi universitetlərdə təhlükəsizliyin gücləndirilməsi strategiyasını müzakirə edəcəklər.
AZƏRTAC xəbər verir ki, artıq 2024-cü il yanvarın 3-də Çexiyanın təhsil naziri Mikulaş Bek tədris müəssisələrində təhlükəsizliyin gücləndirilməsinə dair strategiyanı müzakirə etmək üçün universitetlərin rektorları ilə görüşəcək.
Nazir “Çexiya televiziyası”nın efirində bildirib ki, lazımi tədbirlərin tətbiq edilməsi məqsədilə ali məktəblərə metodiki və maliyyə yardımı göstəriləcək. Mikulaş Bekın fikrincə, tələbələrin və müəllimlərin psixoloji dəstəyinə də diqqət yetirilə bilər.
Qeyd edək ki, dekabrın 21-də kütləvi qatil Praqa Karl Universitetinin filologiya fakültəsinin binasında atəş açaraq 14 nəfəri öldürüb, daha iyirmi beş nəfəri yaralayıb.
Praqa
Bölmənin digər xəbərləri
