Çində sabiq məmur rüşvətə görə edam ediləcək
Pekin, 22 may, AZƏRTAC
Çin Xalq Siyasi Məşvərət Şurasının Şansi əyalət komitəsinin keçmiş sədri Han Yon məhkəmənin hökmü ilə 2 illik möhlətlə edam cəzasına məhkum edilib.
AZƏRTAC xəbər verir ki, Nannin şəhər məhkəməsi sabiq məmurun Cilin və Şansi əyalətlərində, Sincan Uyğur Muxtar Rayonunda müxtəlif vəzifələrdə çalışarkən 261 milyon yuan (təxminən 36,3 milyon ABŞ dolları) rüşvət aldığını sübuta yetirib. O, vəzifə səlahiyyətlərindən sui-istifadə edərək maddi maraq müqabilində müxtəlif şəxslərə və şirkətlərə biznes fəaliyyəti üçün əlverişli şərait yaradıb, habelə məmurların daha yüksək vəzifələrə təyin olunmasına dəstək verib.
Məhkəmə onun bütün siyasi hüquqlardan məhrum edilməsinə, əmlakının müsadirə olunmasına və qanunsuz yolla əldə etdiyi bütün vəsaitin dövlət büdcəsinə geri qaytarılmasına qərar verib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
