Çinin Sincan bölgəsində azad ticarət zonası yaradılır
Pekin, 1 noyabr, AZƏRTAC
Çin hökuməti ölkənin şimal-qərbində yerləşən Sincan Uyğur Muxtar Rayonunda pilot azad ticarət zonası yaradır.
AZƏRTAC xəbər verir ki, ÇXR Dövlət Şurasının (Nazirlər Kabineti) qəbul etdiyi plana əsasən, azad ticarət zonası muxtar rayonun paytaxtı olan Urumçi, habelə Qaşğar və Horqos şəhərləri üzrə üç hissədən ibarət olmaqla, ümumilikdə 179 kvadratkilometr sahəni əhatə edəcək. Əsas diqqət inkişaf etməkdə olan müasir sənaye, xidmət sahələrinə yönəldəcək. Azad ticarət zonası bölgənin “Bir kəmər, bir yol” təşəbbüsünün reallaşmasındakı rolunun genişlənməsinə töhfə verməklə yanaşı, muxtar rayonun iqtisadi inkişafına da müsbət təsir edəcək. Azad ticarət zonasında xarici ticarət imkanları, maliyyə xidmətləri genişləndiriləcək, inteqrasiya edən yerli və xarici ticarətin təşviqi həyata keçiriləcək.
Bu, Çinin ümumilikdə 22-ci, ölkənin şimal-qərb regionunda isə ilk azad ticarət zonasıdır. Ərazisinə görə ÇXR-in ən iri bölgəsi olan Sincan Uyğur Muxtar Rayonu Monqolustan, Rusiya, Qazaxıstan, Qırğızıstan, Tacikistan, Əfqanıstan, Pakistan və Hindistanla sərhəddə yerləşir. Bölgə tarixən İpək yolu ticarətində mühüm rol oynayıb. Hazırda Çindən Mərkəzi və Qərbi Asiyaya, Rusiyaya, Avropaya avtomobil və dəmir yolu nəqliyyatı ilə daşınan yüklərin əhəmiyyətli hissəsi məhz Sincan Uyğur Muxtar Rayonundan keçir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
