C.NAXÇIVANSKİ ADINA HƏRBİ LİTSEYİN MƏZUNU, AZƏRBAYCAN ALİ HƏRBİ MƏKTƏBİNİN KURSANTI NAZİM MURADOVUN ÇIXIŞI
-Möhtərəm Prezident!
Cənab Ali Baş Komandan!
Hörmətli mərasim iştirakçıları!
İcazə verin, Cəmşid Naxçıvanski adına hərbi litseyin müstəqil respublikamızın ali hərbi məktəblərində təhsil alan məzunları adından sizi salamlayım və bu böyük yubiley münasibətilə hər birinizə səmimi təbriklərimizi yetirim.
Hamımız üçün əlamətdar olan bu yubiley mərasimində mən hərbi litseyin yetirməsi olan Milli Qəhrəman Əfqan Hüseynovun büstünün açılış mərasimində möhtərəm cənab Ali Baş Komandanımızın dediyi sözləri xatırlayıram: «Mən oraya hər il gedirdim. Hər dəfə 13, 14, 15 yaşında oğlanlar orada hərbi paltarda, əsgəri addımlarla bizim önümüzdən keçib gedəndə bəzən gözlərimdən yaş gəlirdi. Mən onlara baxdıqca düşünürdüm ki, nə qədər gözəl bir iş görmüşük və bu iş Azərbaycanın gələcəyi üçün nə qədər lazımlıdır».
Cənab Ali Baş Komandan, indi o oğlanlar zabitdir, yüksək hərbi rütbələrə, vəzifələrə çatıblar. Xalqımız elan olunmamış müharibəyə cəlb ediləndə, erməni təcavüzkarları torpaq iddiaları ilə ölkəmizə basqın edəndə onlar keçmiş SSRİ-nin müxtəlif guşələrindən Vətənə axışdılar, Qarabağ uğrunda müqəddəs savaşlara atıldılar, Azərbaycanın ərazi bütövlüyü, müstəqilliyi, dövlətçiliyi naminə qanlarını, canlarını əsirgəmədilər. Adlarını bu gün hörmət və ehtiramla yad etdiyimiz şəhid Milli Qəhrəmanlarımız Rasim İbrahimov, Əfqan Hüseynov, Elşad Əhədov, Mətləb Quliyev, Eldar Məmmədov, Çingiz Mustafayev, Cəlil Səfərov da onların sırasında idilər. Son iki ildə Siz üç dəfə bizim ali hərbi məktəbin qonağı olmusunuz. Hələ də həmin görüşlərin xoş təəssüratı ilə yaşayırıq. Qarşımıza qoyduğunuz vəzifələr uğurla həyata keçirilir.
Cənab Prezident, Siz bizim ali hərbi məktəbdə olarkən demişdiniz: «Dünyada çox peşələr var. Hər bir ölkədə, o cümlədən müstəqil Azərbaycanda da. Amma bütün peşələrdən fərqli olaraq, xalq üçün, millət üçün, hər bir vətəndaş üçün, dövlət üçün ən vacib, ən dəyərli peşə milləti, xalqı, torpağı qorumaq peşəsidir, yəni hərbi peşədir». Məhz Vətənə, torpağa, xalqa olan məhəbbət mənə və mənim kursant yoldaşlarıma zabit peşəsini seçdirdi. Sizi bir daha əmin edirik ki, bu etimadınızı əməli fəaliyyətimizlə, Vətənə sədaqətli xidmətimizlə doğruldacağıq.
Diqqətinizə görə minnətdaram.
Bölmənin digər xəbərləri
