C.NAXÇIVANSKİ ADINA HƏRBİ LİTSEYİN NAXÇIVAN FİLİALININ KURSANTI ƏLİ ƏLİYEVİN ÇIXIŞI
-Zati-Aliləri cənab Ali Baş Komandan!
Hörmətli mərasim iştirakçıları!
İcazə verin, Sizə və bütün mərasim iştirakçılarına Cəmşid Naxçıvanskinin doğulub boya-başa çatdığı qədim Naxçıvan elindən səmimi salamlarımı yetirim.
Mən Azərbaycan ordusunun peşəkar hərbi kadrlara olan tələbatını ödəmək, muxtar respublikada gənclərin hərbi təhsil almaları üçün əlverişli şərait yaratmaq məqsədi ilə Cəmşid Naxçıvanski adına hərbi litseyin 5 il öncə yaradılan Naxçıvan filialının kursantıyam. Yarandığı az vaxt ərzində Naxçıvan filialında çox işlər görülmüşdür.
Cənab Prezident, bu müddət ərzində Siz iki dəfə qonağımız olmuş, şəraitimizlə, təhsilimizlə maraqlanmış, filial kollektivinin qarşısında mühüm vəzifələr qoymusunuz. Fəxrlə bildirirəm ki, filialımızın 100-dən artıq yetirməsi artıq ali hərbi məktəblərin kursantıdır.
Cənab Ali Baş Komandan!
Keçən ilin qızmar yay günlərində filialımızda keçirdiyiniz görüşü nə biz kursantlar, nə müəllimlərimiz, nə də valideynlərimiz unutmurlar. Hər birimizi daha yaxşı oxumağa, təlimlərdə yüksək nailiyyətlər qazanmağa səsləyən nitqiniz biz kursantlara ata öyüdü, sərkərdə xeyir-duası idi. Siz görülən işləri yüksək qiymətləndirdiniz. “Naxçıvan filialı qısa bir zamanda yeni hərbi litseyin yaranması üçün əsas qoyubdur” - dediniz. Sonra da Müdafiə Nazirliyinə, Naxçıvan Muxtar Respublikasının rəhbərliyinə tapşırdınız ki, bu məktəbin maddi-texniki bazasının daha da möhkəmləndirilməsi, ərazisinin genişləndirilməsi, qəbul planının artırılması üçün əlavə tədbirlər görsünlər. Fərəh hissi ilə bildirirəm ki, artıq filialımızın ərazisi genişləndirilmiş, yeni tədris korpusu tikilib istifadəyə verilmiş, təhsil və təlimin keyfiyyətinin yüksəldilməsi üçün möhkəm maddi-texniki baza yaradılmışdır.
Biz xalqımızın tarixini dərindən öyrənir, milli-mənəvi dəyərlərimizə yiyələnirik. Yaxşı bilirik ki, qədim Azərbaycan torpağı olan Naxçıvan Vətənimizin hərb tarixinə böyük sərkərdələr, qəhrəmanlar vermişdir. General Heydər Əliyevin davamçısı olmaq üçün bizim filialda hər cür şərait vardır. Biz göstərilən qayğıya, diqqətə, etimada cavab olaraq tariximizə, xalqımıza, Ali Baş Komandanımıza layiq zabit olmağa söz veririk.
Diqqətinizə görə minnətdaram.
Bölmənin digər xəbərləri
