COVID-19 virusu bədəndə bir ildən çox qala bilir
Bakı, 12 mart, AZƏRTAC
San-Fransiskolu tədqiqatçılar insanların hansı səbəbdən uzun müddət COVID-19 virusundan əziyyət çəkdiyini izah edə biləcək heyrətamiz bir kəşf ediblər. Məlum olub ki, koronavirusun izləri xəstələrin qanında və toxumalarında bir ildən, bəzi hallarda isə iki ildən çox qala bilir.
AZƏRTAC Knowridge saytına istinadla xəbər verir ki, koronavirusa yoluxan bəzi insanlar zaman keçdikcə yorğunluq, beyin dumanlanması, qan-damar, həzm problemləri kimi davamlı simptomlardan əziyyət çəkirlər. Alimlər “uzun COVID” adlandırılan belə vəziyyətlə bağlı yeni araşdırma aparıb.
San-Fransisko Kaliforniya Universitetinin yoluxucu xəstəliklər üzrə mütəxəssisi Maykl Pelusonun rəhbərlik etdiyi komanda tədqiqatın nəticələrini təqdim edib. Onlar infeksiyaya yoluxduqdan 14 ay sonra qanda, iki il sonra isə toxuma nümunələrində həssaslığı yüksək olan testlər vasitəsilə COVID-19 antigenləri kimi tanınan virus hissələrini aşkarlayıblar.
Universitetin tədqiqatına COVID-19-a yoluxmuş 171 şəxs qatılıb. Tədqiqatçılar virusun insan hüceyrələrinə daxil olma prosesinə diqqət yetirərək onların bəzi pasiyentlərin bədənində gözlənildiyindən daha uzun müddət qaldığını müəyyənləşdirib. Komanda, həmçinin toxuma nümunələrini tədqiq edərək, infeksiyadan iki il sonra da virusun izlərini tapıblar. Bu səbəbdən koronavirus xəstələrində uzun müddətli simptomlar müşahidə olunur.
Maykl Peluso və komandası hazırda antiviral dərmanlarla müalicələrin virus qalıqlarını bədəndən təmizləməyə və uzunmüddətli simptomlarını yüngülləşdirməyə kömək edə biləcəyini yoxlamaq üçün klinik sınaqlar aparır.
Bölmənin digər xəbərləri
