“Daily cases” azərbaycanlı və italiyalı gənclərin Xocalı soyqırımı ilə bağlı birgə mitinqindən yazıb
Roma, 28 fevral, AZƏRTAC
İtaliyanın “Daily cases” informasiya portalında “Azərbaycanlı və italiyalı gənclər Xocalı soyqırımını anıb” sərlövhəli yazı yerləşdirilib. Yazıda əsasən Romanın Montecitorio meydanında - İtaliya parlamentinin binası önündə Xocalı soyqırımının 24-cü ildönümü ilə əlaqədar keçirilmiş mitinq barədə məlumat verilir.
Eyni zamanda, tədbirdə azərbaycanlı və italiyalı gənclərin bu faciənin qurbanlarını birgə andıqları vurğulanır. Xocalı soyqırımı haqqında məlumat verilən yazıda bildirilir ki, Xocalı soyqırımı zamanı 613 nəfərin, o cümlədən 106 qadın, 63 azyaşlı uşaq, 70 qocanın həyatına son qoyulub, 1000-dən çox dinc sakin ağır yaralanaraq əlil olub, 1275 nəfər girov götürülüb, onlardan 150 nəfərin taleyi isə hələ də məlum deyil.
Yazıda İtaliya və Azərbaycan arasında mədəni mübadilə üzrə Avropa Assosiasiyasının (EURASIA) təsisçisi Edoardo Paniçinin fikirlərinə də yer verilib. O deyib: “Ümid edirəm ki, bu tədbir Dağlıq Qarabağ münaqişəsinin bu qaranlıq səhifəsinin İtaliya dövləti tərəfindən tanınması istiqamətində başlanğıc nöqtə olar”.
Maqsud Dadaşov
AZƏRTAC-ın xüsusi müxbiri
Roma
Bölmənin digər xəbərləri
