Nazirliyin mətbuat xidmətindən AZƏRTAC-a verilən məlumata görə, iclası giriş sözü ilə açan nazir, general-polkovnik Ramil Usubov bildirmişdir ki, ötən il Azərbaycan cəmiyyətinin bütün sahələrində geniş quruculuq işləri davam etmiş, ölkəmizin iqtisadi qüdrəti daha da möhkəmlənmiş, əhalinin sosial rifah halı xeyli yaxşılaşmışdır. Təməli ümummilli lider Heydər Əliyev tərəfindən qoyulan bu inkişaf, ulu öndərin daxili və xarici siyasət xətti onun layiqli davamçısı, Prezident İlham Əliyev tərəfindən uğurla davam etdirilir. Dövlət başçısının daxili işlər orqanlarına qayğısı, tələbkarlığı sayəsində ümumilikdə respublika ərazisində cinayətkarlıqla mübarizə uğurla təmin edilir, şəxsi heyətin sosial müdafiəsi gücləndirilir, əməkdaşlar arasında nizam-intizam ilbəil möhkəmlənir. Ölkə Prezidentinin gündəlik tələbkarlığı və qayğısı şəxsi heyəti daha məsuliyyətli olmağa, tapşırılan vəzifələrə daha ciddi yanaşmağa sövq etmişdir.

Ramil Usubov demişdir ki, cinayətkarlıqla mübarizə, ictimai təhlükəsizliyin təmini, cinayətlərin açılması və axtarışda olanların tutulması sahəsində ötən illər əldə edilmiş müsbət meyillər qorunub-saxlanılmış, sabitliyin dönməzliyi, əmin-amanlığın nümunəvi qorunması təmin edilmişdir. Nazir narkomaniya ilə mübarizənin və ölümlə nəticələnən bağlı qalmış yol-nəqliyyat hadisələrinin daim DİN rəhbərliyinin diqqət mərkəzində olduğunu bildirmişdir. Eyni zamanda, son illər yol-nəqliyyat hadisələri zamanı ölənlərin sayının nisbətən artmasının narahatlıq doğurduğunu, qəza hadisələrinin açılmasının ərazi polis orqanlarında istənilən səviyyədə təşkil olunmadığını vurğulamışdır.

Sonra Narkotiklərlə Mübarizə Baş İdarəsinin rəisi, polis polkovniki Həzi Aslanov “Narkotik vasitələrin, psixotrop maddələrin və onların prekursorlarının dövriyyəsi haqqında” Azərbaycan Respublikasının yeni Qanununa əsasən bu sahədə görülən işlərin vəziyyəti haqqında məruzə etmişdir.

O bildirmişdir ki, ötən il narkotik vasitələrin qanunsuz dövriyyəsinə qarşı mübarizə sahəsində həyata keçirilmiş tədbirlər daha məqsədyönlü və səmərəli olmuş, əsas diqqət narkotik vasitələrin külli miqdarda satışının aşkarlanmasına yönəldilmişdir. 2005-ci ildə bu qəbildən 244 cinayət faktı aşkar edilmiş, onları törətmiş 146 nəfər, o cümlədən 16 əcnəbi cinayət məsuliyyətinə cəlb olunmuşdur. Ötən il ərzində həyata keçirilmiş əməliyyat-axtarış tədbirləri nəticəsində qanunsuz dövriyyədən 245 kiloqram narkotik vasitə, o cümlədən 34,6 kiloqram tiryək, 150 kiloqram marixuana, 13,3 kiloqram heroin, 38, 4 kiloqram həşiş götürülmüşdür. Narkotiklərin satışı ilə bağlı 742 fakt aşkar edilmişdir ki, bu da 2004-cü illə müqayisədə 68 fakt (10,1 faiz) çox olmuşdur. Narkotik tərkibli bitkilərin əkilib-becərilməsinə qarşı həyata keçirilən “Xaşxaş-2005” şərti adlı kompleks əməliyyat-axtarış və profilaktika tədbirləri nəticəsində 512,7 ton narkotik xassəli bitki aşkarlanaraq məhv edilmişdir. Bu, 2004-cü illə müqayisədə 111,1 ton çoxdur. Məhv edilmiş yaşıl kütlənin 306 tonu, il ərzində müsadirə edilmiş narkotik vasitələrin isə 99,7 kiloqramı bilavasitə baş idarə və onun regional şöbələri tərəfindən aşkar olunmuşdur.

Ölümlə nəticələnən bağlı qalmış yol-nəqliyyat hadisələrinin açılması sahəsində görülən işlər barədə Baş İstintaq və Təhqiqat İdarəsinin rəisi, general-mayor Sərvər Mehrəliyev və Baş Cinayət-Axtarış İdarəsinin rəis müavini, polis polkovniki Müzəffər Novruzəliyev çıxış etmişlər.

Qeyd olunmuşdur ki, həyata keçirilmiş tədbirlər nəticəsində ötən il respublika üzrə qeydə alınmış ölümlə nəticələnən 726 yol-nəqliyyat hadisəsindən 634-nün açılması təmin edilmiş, həmin hadisələrə görə 600 nəfər müəyyən olunaraq, onlardan 409-u cinayət məsuliyyətinə cəlb edilmişdir. Bu hadisələr nəticəsində 938 nəfər, o cümlədən 212 qadın və 70 yetkinlik yaşına çatmayan həlak olmuş, 453 nəfər xəsarət almışdır. Təhlil göstərmişdir ki, hadisələrin yarısı sürücülər tərəfindən sürət həddinin aşılması səbəbindən baş vermiş, ölümlə nəticələnən qəza hadisələrinin qarşısının alınması işi Bakıda, habelə respublikanın bəzi şəhər və rayonlarında lazımi səviyyədə təşkil edilməmişdir.

Müzakirələrdə Baş Dövlət Yol Polisi İdarəsinin rəis müavini, dövlət yol polisi alayının komandiri, polkovnik-leytenant Balakişi Əhmədov, Bakı Şəhər Baş Polis İdarəsinin rəis müavini, polkovnik Şahmar Paşayev, Bakı Şəhər Baş Polis İdarəsi İstintaq İdarəsinin rəisi polkovnik Yaşar Haqverdiyev, Narkotiklərlə Mübarizə İdarəsinin rəisi, polkovnik-leytenant Natiq Nağıyev və başqaları çıxış edərək, hər iki məsələ üzrə görülən işlərdən, xidməti fəaliyyətdə buraxılmış nöqsanlardan danışmışlr.

Kollegiya iclasına yekun vuran general-polkovnik Ramil Usubov bir daha gündəlikdəki məsələlərin aktuallığını vurğulamış, Narkotiklərlə Mübarizə Baş İdarəsində və onun regional şöbələrində narkomaniyaya qarşı mübarizə sahəsində canlanma yarandığını, xüsusən bu qurumların ölkədə böyük ictimai rezonans doğurmuş bir sıra ağır cinayətlərin açılmasındakı rolunu müsbət qiymətləndirmiş, baş idarədə idarəçilik baxımından iş üslubunun yeni dövrün tələblərinə uyğun qurulmasını, yerlərdəki müvafiq xidmət əməkdaşlarına nəzarətin gücləndirlməsini, onların fəaliyyətinin düzgün istiqamətləndirilməsini xüsusi qeyd etmişdir.

Yol hərəkəti təhlükəsizliyinin təmininin polisin əsas fəaliyyət istiqamətlərindən biri olduğunu deyən DİN rəhbəri ötən il qeydə alınmış yol-nəqliyyat hadisələrinin 43,4 faizinin məhz sürücülər tərəfindən sürət rejiminə əməl olunmaması səbəbindən baş verdiyini, ona görə də nəqliyyat vasitələrinin yüksək sürətlə idarə olunmasına qarşı profilaktiki işin gücləndirilməsinin zəruriliyini vurğulamış, bu məqsədlə fevralın 10-dan martın 10-dək respublika ərazisində “Yüksək sürət təhlükə törədir” adı altında təhlükəsizlik aylığının keçirildiyini xatırlatmışdır. Nazir cari ilin yanvar ayı ilə müqayisədə həmin tədbirin keçirildiyi müddətdə yol-nəqliyyat hadisələrinin 36 faiz, qəzalar nəticəsində həlak olanların sayının 54 faiz, yaralananların sayının isə 16 faiz azaldığını, aylığın uğurla həyata keçirilməsində Baş Dövlət Yol Polisi İdarəsinin, Bakı Şəhər Dövlət Yol Polisi İdarəsinin, bəzi ərazi polis orqanlarının müsbət fəaliyyətini qeyd etmişdir. Eyni zamanda, tələb etmişdir ki, ərazi polis orqanlarının rəhbərləri belə tədbirlərin yerlərdə də keçirilməsindən ötrü təşəbbüs göstərməli, təkcə nazirliyin rəhbərliyi səviyyəsində həyata keçirilən tədbirlərlə kifayətlənməməlidirlər.

Bağlı qalmış yol-nəqliyyat hadisələrinin açılmasında istintaq aparatı əməkdaşlarının xüsusi rolunu qeyd edən general-polkovnik Ramil Usubov bəzi müstəntiqlərin bağlı qalmış yol-nəqliyyat hadisələrinin açılmasına nəinki kömək göstərmədiklərini, onların hadisə yerinə vaxtında çıxmamalarını, hadisə yerlərini keyfiyyətsiz, səthi şəkildə müayinə etdiklərini, digər xidmət əməkdaşları ilə qarşılıqlı əlaqələri qura bilmədiklərini və belə mənfi hallardan narazı qalan vətəndaşların yüksək instansiyalara şikayət xarakterli müraciətlər göndərdiklərini demişdir. Nazir ölkə Prezidentinin vətəndaşların ərizə və şikayətlərinə xüsusi diqqətlə yanaşmağı, onlara vaxtında baxılmasını bütün dövlət, icra qurumlarının rəhbərlərindən tələb etdiyini, bunun hər bir vəzifəli şəxs, o cümlədən ərazi polis orqanlarının rəhbərləri, müstəntiqlər üçün bir rəhbər göstəriş olduğunu, bu işdə təqsirkar əməkdaşların gələcəkdə də ciddi şəkildə cəzalandırılacağını bildirmişdir.

Daha sonra nazir kollegiya iştrakçılarının diqqətini DİN rəhbərliyini narahat edən bəzi məsələlərə yönəltmiş, bir sıra konkret tapşırıq və tövsiyələrini vermişdir. Prezidentimizin bütövlükdə daxili işlər orqanlarına, Daxili Qoşunlara, onların maddi-texniki bazasının və sosial müdafiəsinin daha da möhkəmləndirilməsinə daim qayğı göstərdiyini vurğulayan nazir bu məqsədlə dövlət başçısının tapşırığına əsasən yaxın gələcəkdə büdcədən xüsusi vəsait ayrılacağını, bunun yeni texniki vasitələr alınaraq daxili işlər orqanlarının istifadəsinə veriləcəyini, şəxsi heyətin mənzil-məişət şəraitinin daha da yaxşılaşdırılması üçün yeni yaşayış binalarının, habelə müasir tələblərə cavab verən inzibati binaların tikiləcəyini, digər sosialyönümlü tədbirlərin həyata keçiriləcəyini xüsusi vurğulamışdır. Daxili işlər naziri Prezident İlham Əliyevin cinayətkarlıqla uğurlu mübarizənin, sabitliyin, əmin-amanlığın olmadığı yerdə heç bir iqtisadi yüksəlişdən, tərəqqidən söhbət belə gedə bilməyəcəyi barədə dəfələrlə səsləndirdiyi məlum fikri bir daha vurğulayaraq əmin olduğunu bildirmişdir ki, müstəqilliyimizin keşiyində ayıq-sayıq dayanan, dövlətə, dövlətçiliyə və xalqa sədaqətlə xidmət edən daxili işlər orqanlarının şəxsi heyəti dövlətimizin başçısının qarşıya qoyduğu bütün tələb və tapşırıqları bundan sonra da yüksək məsuliyyətlə, layiqincə yerinə yetirəcək, bütövlükdə cari ili daha yaxşı nəticələrlə başa vuracaqdır.