DEMOQRAFİK PARTLAYIŞ: MOSKVADA İLK DƏFƏ ALTI ƏKİZ DOĞULMUŞDUR
Rusiya mətbuatı yazır ki, əkizlərin dünyaya göz açdıqları Moskvanın İzmaylovo rayonundakı 36 nömrəli doğum evi həmişə kazarma vəziyyətində olur. Buraya pasport qeydiyyatı və mübadilə kartı olmayan hamilələri gətirirlər. Müxtəsəri, əsla elit tibb müəssisəsi deyildir. Əvəzində, sentyabrın 12-də burada baş verən hadisəyə dünyanın hər hansı doğum evi həsəd aparardı. Kesar kəsiyinin köməyi ilə altı əkiz doğulmuşdur – Moskva hələ belə hadisə görməyibdir. Xoşbəxt ananın sevimli əri Mərdan ailədə bu qədər artımdan xəbər tutan kimi 3 kiloqram ağırlığında sovqatla özünü doğum evinə yetirmişdir. Bəs, niyə cəmi 3 kiloqram? Çünki buraya ondan çox yemək gətirməyə icazə verilmir.
Həkimlər demişlər ki, əvvəlcə qız dünyaya gəldi. Çəkisi 1 kq 540 q, boyu 40 sm idi. Bir dəqiqədən sonra palatada onun qardaşının çığır-bağırı eşidildi. Çəkisi 1 kq 615 q, boyu 36 sm idi. Onun ardınca o biriləri doğuldu: qız – 1 kq 340 q, boyu 38 sm; oğlan – 1 kq 134 q, boyu 37 sm; oğlan – 1 kq 44 q, boyu 38 sm; qız – 800 q, boyu 33 sm. Körpələrin hamısını dərhal reanimasiya blokuna göndərmiş və ağ ciyərlərin süni ventilyasiyası sisteminə qoşmuşlar, çünki vaxtından əvvəl, hamiləliyin 30-cu həftəsində doğulmuşlar. Buna görə də həkimlər nə körpələrin, nə də qəhrəman ananın həyatına risk etmək istəməmişlər. Təəssüf ki, ən balaca çağanın həyatını xilas etmək mümkün olmamışdır. O, bazar ertəsi gecə keçinmişdir. Ananın özünün sağlamlığı üçün heç bir təhlükə yoxdur. O da hələlik reanimasiyadadır. Həkimlərin sözlərinə görə, onu yaxın günlərdə adi palataya keçirəcəklər.
Tibbi statistikaya görə, altı əkiz doğulması ehtimal 4712 milyonda 1-ə bərabərdir. Müasir təbabətə altı əkizin doğulduğu cəmi 130 hal məlumdur. Lakin son vaxtlar belə əkizlər tez-tez doğulur. Həkimlərin fikrincə, buna səbəb ya süni hamiləlik, ya da mayalanmaya gətirib çıxaran preparatların qəbul edilməsi ola bilər. Üç cüt əkizin doğulmasına zahiri amillər – ekologiya, stress keçirilməsi və s. də təsir göstərə bilər.
Ümumiyyətlə, bundan da çox uşaq doğan qadınlar olmuşdur. Məsələn, 1999-cu ildə malayziyalı qadın birdən-birə doqquz uşaq doğmuşdur. Halbuki, bunadək o, iki il sonsuzluqdan müalicə edilmişdi. Doğrudur, körpələrin heç biri sağ qalmamışdır. İlk 6 saat ərzində onlar bir-birinin ardınca tələf olmuşdur. Doğulmuş uşaqların sayına görə dünya rekordu isə Braziliyaya məxsusdur. 1946-cı il aprelin 22-də orada 10 əkiz doğulmuşdur. Onların sağ qalıb-qalmadığı məlum deyildir.
Son illər altı əkizin dünyaya gəlməsi halları aşağıdakı ölkələrdə qeydə alınmışdır: 1996-cı il – Meksika (2 dəfə), İspaniya, Efiopiya, ABŞ; 1997-ci il – Çin; 1998-ci il – Yəmən; 2001-ci il – Səudiyyə Ərəbistanı; 2002-ci il – ABŞ (2 dəfə), Portuqaliya, Serbiya; 2003-cü il – Livan.
Bölmənin digər xəbərləri
