Dendrologiya İnstitutu 35 xarici ölkənin botanika bağları ilə əməkdaşlıq edir
Bakı, 26 aprel, AZƏRTAC
Elm və Təhsil Nazirliyinin Dendrologiya İnstitutu 35 xarici ölkə ilə sıx elmi əməkdaşlıq edir. Dünya Botanika Bağları Cəmiyyəti, o cümlədən Rusiya, Ukrayna, Belarus, Polşa və Moldovanın botanika bağları ilə əməkdaşlıq əlaqələri qurulub və bir sıra elmi nailiyyətlər əldə edilib. İnstitutun əməkdaşları tərəfindən 2022-2023-cü illər üzrə 135 məqalə və tezis yerli və beynəlxalq impakt faktorlu jurnallarda dərc olunub.
Bu barədə AZƏRTAC-a Dendrologiya İnstitutundan bildirilib. Dendrologiya İnstitutunun 2022-ci il üzrə elmi-tədqiqat işlərinin nəticələri MDB ölkələrinin Nəbatat Bağları Cəmiyyətinin “Xəbərlər” bülletenində dərc edilib. Ötən il Dendrologiya İnstitutunun 2 layihəsi - “Yerli xammal əsaslı ekoloji təhlükəsiz yeni bağ məlhəmi preparatının alınması və tətbiq edilməsi” və “Köhnə neft istismar ərazi torpaqlarının fitoremediasiya üsulu ilə təmizlənməsi” qalib layihələr siyahısında yer alıb. Bundan başqa, elmi-tədqiqat nəticələrinin tətbiqinə əsaslanaraq “Rozmarin yağı (təmiz və müxtəlif qatqılarda) və qurusunun kiçik həcmli istehsalı, kompleks tədqiqatların aparılması”, “Çaytikanı yağı (təmiz və müxtəlif qatqılarda) və qurusunun kiçik həcmli istehsalı, Azərbaycan florasında ixrac potensiallı, qida əhəmiyyətli, introduksiya edilmiş ağac və kol bitkilərinə məxsus meyvə və giləmeyvə məhsullarının emalı üzrə 3 biznes plan hazırlanaraq aidiyyəti qurumlara təqdim edilib.
Bölmənin digər xəbərləri
