Deputat: Azərbaycan dövlətinin amalı daha səmərəli və faydalı işlər görməyə yönəlib
Bakı, 14 oktyabr, AZƏRTAC
Otuz il ərzində xalqımız böyük faciələrlə üzləşdi. Bir milyon insan evsiz-eşiksiz qaldı, torpaqlarımız tamamilə dağıdıldı, etnik təmizləmə aparıldı, Xocalı soyqırımı törədildi. Nəhayət, bütün güclər Ermənistanın arxasında dayansalar da, Azərbaycan əvvəl Ümummilli Lider Heydər Əliyevin cızdığı yol xəritəsi, sonra isə Prezident İlham Əliyevin siyasi iradəsi hesabına haqqına sahib çıxdı.
Bu fikirləri AZƏRTAC-a açıqlamasında Milli Məclisin deputatı filologiya elmləri doktoru Elnarə Akimova söyləyib. O bildirib ki, müharibədən əvvəl və müharibə dövründə Paşinyan başda olmaqla Ermənistan hakimiyyəti nümayəndələrinin, Qarabağdakı separatçıların başçılarının Azərbaycana qarşı sərt açıqlamaları ölkəmizə yönəlmiş çirkin kampaniyanın bir hissəsi idi. Mesajlar, qorxu və təhdidlər separatçıların, necə deyərlər, özlərinə yaraşan üslubda idi: Kür çayını keçəcəkləri ilə bağlı xəbərdarlıqlar, raket zərbələri, Mingəçevir stansiyası ilə bağlı hədələr və s. Sənaye şəhərimiz Mingəçevirə ilk raket hücumu, Ermənistan tərəfindən Mingəçevir şəhərindəki su anbarının və elektrik stansiyasının hədəf alınması çoxsaylı insan tələfatının baş verməsinə və Cənubi Qafqaz regionu üçün ciddi ekoloji fəsadların yaranmasına nail olmaq məqsədi daşıyırdı. Yaxud Gəncəyə atılan raket zərbələri xalqımızın gözünü qorxutmaq, ordumuzun, insanlarımızın daxili müvazinətini qırmaq niyyətinə hesablanmış addımlar idi. Qarabağla bağlı məğlubiyyət hissi ilə barışmamaları, yaxud bunu ağıllarına belə gətirməmələri onlara belə bir açıqlamalar səsləndirməyə, hədə-qorxu gəlməyə əsas verirdi. Əslində, dediklərinin bir qismini reallaşdırdılar da. Gəncə şəhərinə ard-arda beş dəfə endirilən raket zərbələri düşmənin qəddarlığının və nə qədər yırtıcı xarakterə malik olduğunun bir daha sübutu idi.
“Onlara dəstək olan Qərb havadarları, bu günün özündə belə bizimlə bədnam sanksiyaların, qətnamələrin dili ilə danışmağa cəsarət edən mənəviyyat yoxsulları bu faciələrin miqyasına nə qədər göz yumsalar və qulaq tıxasalar da, uşaq ölümlərinə, mülki insanların gecə yuxuda olarkən qana boğulmalarına, evlərinin yerlə-yeksan edilmələrinə etinasız qalsalar da, bu dəfə haqq savaşımızda qalib gəldik. Baş verənlər isə düşmənin gücünün deyil, zəifliyinin göstəricisi idi. Azərbaycanın gücü qarşısında başlarını itirmiş erməni siyasətinin və onların havardarlarının fiaskosu, son çırpınışları idi. Anlayırdılar ki, 1990-cı illərin əvvəllərinin ab-havası çoxdan geridə qalıb, artıq qarşılarında başı vəzifə, kürsü davasına qarışıb torpaq uğrunda mübarizəyə o qədər də cəhd etməyən hakimiyyət yoxdur. Bu müddət ərzində dövlət olaraq güclənmişik, hərbi potensialımızı artırmışıq, daxili müvazinətimizi bərpa etmişik, xalq olaraq da mənəvi qüdrətimizi xilas etmişik. “Qarabağ Azərbaycandır”! Bu fikir sübuta ehtiyacı olmayan aksiom idi və hər şeydən əvvəl ötürdüyü emosional enerji baxımından diqqəti cəlb etdi. Müharibədə döyüşə atılan xalq üçün isə inam hətta mükəmməl hərbi texnikadan da vacib məsələdir”, - deyə müsahibimiz əlavə edib.
“Bunu onlara sübut etməyə 44 günlük müharibə, bu müharibənin hər günü bir Qələbə müjdəsi ilə səciyyələnən amili yetərli oldu. Ötən ilin 20 sentyabrında bütün ərazilərimiz üzərində qazanılan suverenlik, Azərbaycanın öz ərazi bütövlüyünü tam bərpa etməsi isə ermənilərin bu torpaqlardan ümidinin əbədi kəsilməsinin qarantı oldu. Artıq Azərbaycan dövlətinin amalı daha səmərəli, faydalı işlər görməyə yönəlib. Dövlətimizin məqsədi nəinki xalqımız, həmçinin planetar səviyyədə, bəşəriyyətin təhlükəsizliyi üçün çalışmaqdır. Həmçinin Qarabağda gözəlliklər yaratmaq, bərpa-quruculuq işləri həyata keçirmək, dünyaya sülhlə, rifah və təhlükəsizliklə bağlı mesajlar ötürüb bütün bəşəriyyətin xilasını prioritetə çevirməkdir. Bu o anlayışlar və amallardır ki, heç vaxt Ermənistan dövlətinin lüğətində və düşüncə planında olmayıb”, - deyə E.Akimova fikrini yekunlaşdırıb.
Bölmənin digər xəbərləri
