Deputat: Cəbrayılın azad edilməsi Prezident-xalq-Ordu birliyinin gücünün və qətiyyətinin sübutudur
Bakı, 4 oktyabr, AZƏRTAC
Azərbaycan xalqının Ümummilli Lideri Heydər Əliyevin vaxtilə işğal altında olan ərazilərimiz haqqında deyirdi: “Arzu edirəm ki, sizinlə birlikdə gedək Şuşaya. Gedəcəyik, inanın ki, gedəcəyik. Şuşa Azərbaycanın gözüdür, hər bir azərbaycanlı üçün bu, iftixar mənbəyidir. Şuşa bizim mədəniyyətimizin, tariximizin rəmzidir. Şuşa hamı üçün əzizdir. Amma tək Şuşa yox, Laçın dağları da belə əzizdir. Heç vaxt biz Laçınsız yaşaya bilmərik. Ağdam kimi gözəl bir şəhər, Füzuli, Cəbrayıl, Zəngilan, Qubadlı, Kəlbəcərin o bulaqları, Kəlbəcərin o İsti suyu. Biz onlarsız yaşaya bilmərik”. Bəli, biz onlarsız yaşaya bilmədik, Vətənimizin bir parçasının uzun illər erməni işğalı altında qalması ilə barışmadıq. Uzun illər bütün səviyyələrdə mübarizə apardıq, iqtisadiyyatımızı gücləndirdik, beynəlxalq hüquqi əsas yaratdıq, nizami ordu qurduq, hər birimiz səfərbər olduq. Nəhayət nəyi, nə zaman və necə etməyi bilən Prezident, Ali Baş Komandan “İrəli”, “Vaxt yetişdi” dedi. 2020-ci il sentyabrın 27-dən başlayan Zəfər yürüşü ilə Qarabağ və Şərqi Zəngəzuru erməni işğalından azad etdik. Azərbaycanın ərazi bütövlüyü təmin olundu.
AZƏRTAC xəbər verir ki, bu fikirləri Milli Məclisin Ailə, qadın və uşaq məsələləri komitəsinin sədri, professor Hicran Hüseynova bildirib.
O qeyd edib ki, Cəbrayıl şəhərinin inzibati mərkəzi 44 günlük müharibənin gedişində azad olunan ilk şəhərimiz doğma dədə-baba torpağımıza qayıdacağımızdan, tarixi qələbəmizdən xəbər verirdi. Bu gün biz Cəbrayıl Şəhəri Gününü qeyd edirik.
“Cəbrayılın azad olunması Ordumuza əlavə güc verdi, inam verdi və şanlı Ordumuz öz tarixi missiyasını digər yerlərdə də icra edərək torpaqlarımızı işğaldan azad etdi. Bu gün həm də Gəncə şəhərinin Ermənistan silahlı qüvvələri tərəfindən raket zərbələri ilə vurulmasının 3-cü ildönümüdür. Azərbaycan Ordusu hərbi əməliyyatlar zamanı bütün beynəlxalq hüquqa, norma və prinsiplərə uyğun davranmışdır, mülki əhaliyə heç bir ziyan dəyməmişdir. Ermənistan silahlı qüvvələri ilə hərbi əməliyyatlar zamanı məğlub olduqları üçün döyüş meydanından uzaq məsafədən yerləşən şəhər, rayon və kəndlərimizi atəşə tuturdu. Düşmən Azərbaycan Ordusunun uğurlu əməliyyatları nəticəsində geri çəkildikcə əraziləri minalayaraq növbəti təxribat əməllərinə yol verməklə, artıq yeni metodlardan istifadə edərək dinc sakinlərimizə qarşı cinayətlər törədirdi. Üç il bundan əvvəl Ermənistan silahlı qüvvələri Azərbaycanın Gəncə şəhərində mülki insanların sıx məskunlaşdığı ərazilərə raketlərlə hücum edir, barbarlıq və vandalizm aktı törədirdilər. Bu, həm də Ermənistanın siyasi-hərbi rəhbərliyinin zəifliyini və təşvişdə olduqlarını göstərir”, - deyə deputat bildirib.
Müzəffər Ali Baş Komandan, Prezident İlham Əliyevin rəhbərliyi ilə “Dəmir yumruq” əməliyyatını uğurla davam etdirən yenilməz Ordumuzun, əsgər və zabitlərimizin qəhrəmanlığı, şücaəti nəticəsində Cəbrayılın azad olduğunu söyləyən H.Hüseynova qeyd edib: Cəbrayıl şəhərində və işğaldan azad edilmiş bütün doğma torpaqlarımızda üçrəngli bayrağımız dalğalanır və əbədi dalğalanacaq! Düşmən qabağımızda diz çökdü, ağ bayraq qaldırdı və bundan sonra Azərbaycan xalqı əbədi olaraq qalib xalq kimi yaşayacaq!”
Cəbrayılın işğalı müasir tariximizin ağrılı səhifələrindən biridir. 1993-cü il avqustun 23-də Ermənistan Silahlı Qüvvələri Cəbrayılı, o cümlədən Cəbrayıl şəhərini ələ keçirib. Rayon bir şəhər, dörd qəsəbə və 92 kənddən ibarət olduğu üçün bu işğal böyük iztirab və dağıntılarla nəticələnib. Rayona təkcə fiziki infrastrukturu deyil, həm də mədəni və tarixi irsi əhatə edən 13,928 milyard ABŞ dolları məbləğində ziyan dəyib. İşğal nəticəsində 72 orta məktəb, 8 xəstəxana, 132 tarixi abidə, 150 mədəniyyət ocağı, 100-ə yaxın kənd vəhşicəsinə dağıdılıb.
Cəbrayılın Ermənistan tərəfindən işğalı nəticəsində rayonun vandalizmə məruz qaldığını söyləyən deputat deyib: “Divlər sarayı” mağarası, “Məscid təpəsi”, arxeoloji türbələr, məscidlər və məqbərələr də daxil olmaqla çoxsaylı tarixi və mədəniyyət obyektləri zədələnmiş və ya tamamilə dağıdılmışdır. Bu mədəni irsin itkisi faciədir, çünki o, çoxəsrlik tarixi və şəxsiyyəti silir. 27 il uzun sürən işğaldan sonra nəhayət ki, Cəbrayıl azad edildi. 2020-ci ilin sentyabr-oktyabrın əvvəllərində bir neçə kəndin, o cümlədən Cəbrayıl şəhəri və 9 ətraf kəndin oktyabrın 4-də bərpası ilə işğaldan azad edilmə prosesi başlayıb. Bu, Cəbrayılın ağır günləri, cəbrayıllıların məcburi köçkünlük dövrü sona çatdı”.
Vurğulanıb ki, 2020-ci il oktyabrın 4-də Cəbrayılın azad edilməsi Prezident, Müzəffər Ali Baş Komandan xalqımızın, Ordumuzun birliyinin gücünün və qətiyyətinin sübutudur. İşğal zamanı əziyyətlərə baxmayaraq, Cəbrayıl bərpa və firavanlıq yolundadır. Bölgənin yenidən qurulması, mədəni irsinin bərpası və sakinləri üçün imkanların yaradılması səyləri bu şəhərin tarixinin qorunub saxlanılmasına sarsılmaz sadiqliyi əks etdirir. Cəbrayılın işğaldan azadlığa gedən yolu möhkəmlik, ümid və daha parlaq gələcək hekayəsidir.
Bölmənin digər xəbərləri
