Deputat: Diaspor nümayəndələrimizin qarşısında daha böyük vəzifələr dayanır
Bakı, 22 aprel, AZƏRTAC
Azərbaycan diasporunun yaradıcısı və diaspor fəaliyyətinin banisi ümummilli lider Heydər Əliyevdir. Azərbaycanlılar tarixən dünyanın müxtəlif ölkələrinə səpələniblər. Bu, təbii haldır. Amma dünyanın harasında olmasından asılı olmayaraq, hər bir xalq öz milli kimliyini, dilini və doğma vətənini unutmamalıdır. Xaricdə yaşayan hər bir azərbaycanlı onun daima bağlı olduğu bir Vətəninin olduğunu unutmamalıdır. Çünki Vətən dünyanın harasında yaşamasından asılı olmayaraq, öz soydaşlarını heç vaxt unutmur, yaşadıqları ölkədə hər hansı bir xoşagəlməz hal baş verdikdə dövlətimiz dərhal orda yaşayan soydaşlarımızın taleyini düşünür və onların təxliyə olunması ilə bağlı tədbirlər görür. Eynilə soydaşlarımız da öz vətənini heç vaxt unutmamalı, azərbaycanlı olaraq yaşadıqları ölkələrdə o ölkənin qanunlarına riayət etməli və layiqli vətəndaş kimi yaşamalı, həm də öz ölkəsini unutmamalı və yüksək səviyyədə təmsil etməlidirlər. Ona görə də ümummilli lider Heydər Əliyev 2001-ci ildə keçirilən Dünya Azərbaycanlıların I Qurultayında etdiyi çıxışda dünya azərbaycanlılarına səslənərək demişdi: “Bütün dünyaya səpələnmiş azərbaycanlıların birliyi, həmrəyliyi indi həm bizim üçün, müstəqil Azərbaycan dövləti üçün, həm də dünyanın müxtəlif ölkələrində yaşayan azərbaycanlılar üçün xüsusi əhəmiyyət kəsb edir”.
Bunu AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, uzun illər formalaşmış və Azərbaycana qarşı təşkilatlanaraq fəaliyyət göstərən erməni lobbisi torpaqlarımızı işğal etməsinə və bizə qarşı soyqırımları törətməsinə baxmayaraq özlərini məzlum və əzilmiş xalq kimi təqdim edərək dünya ictimaiyyətini özlərinin yalanlarına inandıra bilib. Azərbaycan diasporunun qarşısında dayanan əsas məsələlərdən biri və birincisi erməni yalanlarını ifşa etmək və əli azərbaycanlıların qanına batmış ermənilərin vəhşi bir qəbilə olduğunu dünyaya çatdırmaq idi. Məhz Dünya Azərbaycanlıların I Qurultayında ümummilli lider Heydər Əliyevin dünyada yaşayan azərbaycanlılara çağırış etməsi və diaspor fəaliyyətinin təşkili üçün tövsiyələrini verilməsi dünyada yaşayan azərbaycanlıların təşkilatlanması və planlı şəkildə fəaliyyətlərinin təqdim edilməsi baxımından çox vacib oldu. Qurultayda Heydər Əliyev dünya azərbaycanlılarına çağırış edərək qeyd etdi: “Hamımız çox iş görməliyik ki, müxtəlif ölkələrdə yaşayan azərbaycanlılar daha da güclənsinlər, iqtisadi cəhətdən daha da möhkəmlənsinlər, yaşadıqları ölkələrin ictimai-siyasi həyatında fəal iştirak edə bilsinlər. O ölkənin həyatına öz təsirlərini göstərə bilsinlər. Beləliklə də müxtəlif ölkələrdə Azərbaycanın müstəqilliyini, onun xarici siyasətini təbliğ etməklə yanaşı, Azərbaycanın problemlərinin həll olunmasına yardım etsinlər”.
2002-ci ildə Ulu Öndərin Sərəncamı ilə Xarici Ölkələrdə Yaşayan Azərbaycanlılarla iş üzrə Dövlət Komitəsinin yaradılması dünyada yaşayan soydaşlarımızın bir mərkəzdən planlı şəkildə diaspor fəaliyyətlərini göstərməsinə yol açdı.
Deputatın sözlərinə görə, Azərbaycan diasporunun qarşısında çox ciddi vəzifələr dayanırdı. Dövlətimizin və xalqımızın qarşısında torpaqlarımızı erməni işğalından azad etmək kimi tarixi missiya var idi. Prezident İlham Əliyevin rəhbərliyi ilə Azərbaycan dövləti günü-gündən güclənir, Ordu yenidən qurulur və müasirləşdirilirdi. Azərbaycan dünya birliyinə daha sürətlə inteqrasiya olunmağa, dünya ölkələri Azərbaycanın mövqeyi ilə hesablaşmağa və hörmətlə yanaşmağa başlayırdı. Dünyaya Azərbaycanın həqiqətlərinin çatdırılması kimi bir missiya da diasporumuzun üzərinə düşürdü. Ona görə də Prezident İlham Əliyev diaspor ilə bağlı çıxışında qeyd etmişdi: “Nəinki Dağlıq Qarabağ, İrəvan xanlığı, Zəngəzur, Göyçə - bütün bunlar tarixi torpaqlarımızdır. Bu həqiqətlər çatdırılmalıdır. Ona görə bu istiqamət diaspor təşkilatları üçün əsas olmalıdır”.
“Diasporumuz Leyla Əliyevanın rəhbərliyi ilə dünyada aparılan “Xocalıya ədalət!” kompaniyasına qoşularaq müxtəlif ölkələrdə geniş aksiyalar və tədbirlər keçirdi. Diasporumuzun nümayəndələri Vətən müharibəsi dövründə də, - şanlı Ordumuz torpaqlarımızı işğaldan azad etdiyi kimi, - 44 günün hər bir günündə dünya ölkələrində küçələrə Azərbaycanın üçrəngli bayraqları ilə çıxaraq haqq işimizi gördüyümüzü dünya ictimaiyyətinin diqqətinə çatdırmaqla informasiya müharibəsində qalib gəlməyimizdə yaxından iştirak etdilər.
Beləliklə diasporumuz bu gün daha da çox təşkilatlanıb və Azərbaycanın maraqlarını dünyada müdafiə edən lobbiçilik fəaliyyətini ortaya qoya bilib. Diaspor nümayəndələrimizin qarşısında daha böyük vəzifələr dayanır. Təbii ki, bu vəzifələr 44 günlük Vətən müharibəsində yaratdığımız yeni reallığa uyğun olaraq bu gün Şuşada keçirilən Dünya Azərbaycanlılarının V Qurultayında dövlətimizin başçısı İlham Əliyev tərəfindən səsləndirildi. Dünyada yaşayan hər bir soydaşımız ölkəmizin səfiridir və düşünürəm ki, bundan sonra da bütün azərbaycanlılar Azərbaycanı dünyada daha yaxşı təmsil edəcəklər”, - deyə Azər Badamov fikirlərini yekunlaşdırıb.
Bölmənin digər xəbərləri
