Deputat: Yeni stansiya ölkəmizin enerji potensialını əhəmiyyətli dərəcədə gücləndirəcək
Bakı, 13 fevral, AZƏRTAC
Dünya siyasi arxitekturasının dəyişdiyinin müşahidə olunduğu bir zamanda, xüsusilə də dördüncü sənaye inqilabının gətirdiyi yeni çağırışlara uyğun olaraq hər bir ölkə ətrafda baş verən proseslərin iştirakçısı olaraq öz maraqlarını təmin etməyə çalışır. Bu gün postpandemiya dövründə mövcud iqtisadi-siyasi kataklizmlərin fonunda dünyamız artıq yeni sistemin üzərində qurulan düzəndə fəaliyyətini davam etdirir.
Azərbaycan Prezidenti də qlobal arenada baş verən prosesləri düzgün qiymətləndirərək dünyada, xüsusilə də Avropa qitəsində cərəyan edən hadisələrdən yeni siyasi mexanizm kimi mükəmməl şəkildə istifadə edir, həm ölkə daxilində, həm də xarici siyasətdə bu istiqamətdə hesablanmış, ardıcıl addımlar atır.
Bu barədə Milli Məclisin deputatı Məzahir Əfəndiyev AZƏRTAC-a açıqlamasında bildirib.
Görülən işlərdən biri kimi, fevralın 13-də Prezident İlham Əliyevin Bakıda “Gülüstan” sarayında müstəqillik dövrünün 1280 MVt gücündə ən böyük İstilik Elektrik Stansiyasının təməlqoyma mərasimində iştirakını qeyd edən deputat deyib: “Burada əsas məqsəd ölkəmizin enerji potensialını əhəmiyyətli dərəcədə gücləndirmək, eyni zamanda, Mingəçevir şəhərinin Azərbaycanın elektroenergetika mərkəzi kimi önəmini daha da artırmaqdır. Bu təşəbbüsün “Heydər Əliyev İli”nə təsadüf etməsi xüsusi bir haldır, belə ki, məhz Ulu Öndərin rəhbərliyi ilə 1976-cı ildə Mingəçevirdə böyük elektrik stansiyasının təməli qoyulmuş və şəhər nəinki Azərbaycanın, həm də Cənubi Qafqazın enerji mərkəzinə çevrilmişdir.
Eyni zamanda, bu günün ən mübarək və əsas məsələsi ondan ibarətdir ki, Prezident İlham Əliyevin də vurğuladığı kimi, yeni elektrostansiya ən müasir standartlara uyğun olacaq və demək olar ki, daxili imkanlar hesabına tikiləcək. Sərf olunacaq maliyyə vəsaitinin 60 faizi “Azərenerji” ASC-nin hesabına, qalan 40 faiz isə kreditlər vasitəsilə təmin ediləcək”.
Məzahir Əfəndiyevin sözlərinə görə, 2025-ci ildə istifadəyə veriləcək yeni elektrostansiya bir tərəfdən ölkədə enerjiyə olan daxili tələbatın tam olaraq ödənilməsini həyata keçirəcək, digər tərəfdən isə Azərbaycanın Avropa İttifaqı, o cümlədən İttifaqa üzv dövlətlərlə imzaladığı memorandumların icrasına yönəlik əməli fəaliyyətə dəstək olacaq.
Bu gün enerji təhlükəsizliyi, eyni zamanda, alternativ və bərpaolunan enerjinin istifadəsi müasir dünyamızın, o cümlədən Avropa qitəsinin ən aktual məsələsinə çevrilib. Azərbaycan da öz növbəsində bu sahəni Cənubi Qafqazda dayanıqlı sülhün əldə olunması, Ermənistanla Böyük Sülh Sazişinin imzalanmasında yeni siyasət kimi məharətlə istifadə edir.
Deputat qeyd edib ki, bu günə qədər Azərbaycan nefti və qazı Avropa İttifaqı ölkələri arasında daha çox İtaliyaya nəql olunub. Təsadüfi deyil ki, bu gün Azərbaycan məhz İtaliya ilə qarşılıqlı hörmətə əsaslanan, etibarlı əməkdaşlıq qurub. Bu gün İtaliya həm beynəlxalq platformalarda Azərbaycanı dəstəkləyir, həm də doğma Qarabağımızın bərpa və yenidənqurma işlərində yaxından iştirak edir. Bu baxımdan bu gün yeni elektrostansiyanın açılış mərasimində xarici əməkdaşlıq çərçivəsində İtaliyanın şirkətlər və “Made in Italy” naziri də iştirak etdi. Bu münasibətlər digər Avropa İttifaqı ölkələri üçün də Azərbaycanın nə qədər etibarlı, sözünə və imzasına sadiq tərəfdaş olduğunun bariz nümunəsidir.
Bölmənin digər xəbərləri
