Umud Mirzəyev: Azərbaycanın yaratdığı yeni reallıqlar tarixi ədalətin və milli birliyin təntənəsidir
Bakı, 9 oktyabr, AZƏRTAC
Prezident İlham Əliyevin Yeni Azərbaycan Partiyasının VIII Qurultayında səsləndirdiyi fikirlər Azərbaycanın son illərdə keçdiyi tarixi yolun, əldə etdiyi siyasi və hərbi qələbələrin, eləcə də Cənubi Qafqazda formalaşdırdığı yeni geosiyasi reallıqların mahiyyətini bir daha aydın şəkildə ortaya qoyur.
Bu fikirləri AZƏRTAC-a açıqlamasında Beynəlxalq Avrasiya Mətbuat Fondunun prezidenti, Azərbaycan Mətbuat Şurasının İdarə Heyətinin üzvü Umud Mirzəyev söyləyib.
O qeyd edib ki, Azərbaycan xalqının uzun illər davam edən mübarizəsinin ən böyük gücü milli birlik, tarixi ədalətə inam və dövlətin qətiyyətli siyasi iradəsi olub: “Azərbaycan xalqı onilliklər ərzində öz torpaqlarının işğalı ilə barışmadı, beynəlxalq ədalətsizliyə baxmayaraq, haqqından geri çəkilmədi. Xalqımızın yumruq kimi birləşməsi yalnız müharibə dövründə meydana çıxan həmrəylik deyildi. Bu, illərlə formalaşmış milli iradənin, Vətənə bağlılığın və dövlətçilik düşüncəsinin təzahürü idi. Prezident İlham Əliyevin rəhbərliyi ilə Azərbaycan dövləti həmin iradəni tarixi nəticəyə çevirdi. Bu baxımdan Azərbaycanın Qələbəsi təkcə hərbi üstünlüyün deyil, xalqla dövlət arasında mövcud olan sarsılmaz birliyin təntənəsidir”.
Umud Mirzəyevin sözlərinə görə, Azərbaycanın qazandığı Qələbə yalnız ölkəmizin ərazi bütövlüyünün və suverenliyinin bərpası ilə məhdudlaşmadı. Bu tarixi hadisə bütövlükdə regionun siyasi mənzərəsini dəyişdirdi, onilliklər ərzində mövcud olmuş yanlış təsəvvürləri və əsassız siyasi iddiaları alt-üst etdi: “Bir zamanlar “Qarabağ Ermənistandır və nöqtə” deyən siyasi rəhbərliyin bu gün Azərbaycanın ərazi bütövlüyünü tanımağa məcbur olması təsadüfi hadisə deyil. Bu, Azərbaycanın yaratdığı yeni siyasi və hərbi reallıqların nəticəsidir. Ermənistanın mövqeyindəki dəyişiklikləri yalnız xoş niyyətin, yaxud sülhə könüllü meyillənmənin nəticəsi kimi təqdim etmək tarixi həqiqətləri təhrif etmək olardı. Azərbaycan öz gücü, xalqının birliyi, ordusunun qəhrəmanlığı və Prezidentinin siyasi qətiyyəti sayəsində qarşı tərəfi uzun illər inkar etdiyi reallığı qəbul etmək məcburiyyətində qoydu”.
BAMF prezidenti vurğulayıb ki, dövlətimizin başçısının çıxışında xüsusi diqqət çəkən məqamlardan biri də tarixi yaddaşın qorunması ilə bağlı səsləndirdiyi prinsipial mövqedir: “Tarixi unutmaqla dayanıqlı sülh qurmaq mümkün deyil. Ermənistanın indiki rəhbərliyinin 2018–2020-ci illərdə nümayiş etdirdiyi ritorika, Azərbaycana qarşı ərazi iddiaları və təxribat xarakterli bəyanatları yaxın keçmişimizin danılmaz faktlarıdır. Bu gün həmin siyasi rəhbərliyin beynəlxalq ictimaiyyətə yalnız sülh tərəfdarı kimi təqdim edilməsi, keçmiş mövqelərinin isə məqsədli şəkildə arxa plana keçirilməsi obyektiv yanaşma sayıla bilməz. Əlbəttə, sülh istiqamətində atılan real addımların əhəmiyyətini inkar etmək olmaz. Lakin sülhün səmimiliyi yalnız bəyanatlarla deyil, konkret siyasi qərarlarla, qarşılıqlı öhdəliklərə əməl olunması və revanşist meyillərdən qəti şəkildə imtina edilməsi ilə ölçülməlidir”.
Bölmənin digər xəbərləri
