Türkiyənin daxili işlər naziri cinayətkarlığa qarşı mübarizədə beynəlxalq əməkdaşlığın vacibliyini vurğulayıb
Ankara, 9 oktyabr, AZƏRTAC
Cinayətkarlığa qarşı mübarizə yalnız milli sərhədlərlə məhdudlaşmamalıdır. Bu ilin ilk doqquz ayında xaricdən axtarışda olan 714 şəxs Türkiyəyə gətirilib. Bu, müsbət bir tendensiyadır.
AZƏRTAC xəbər verir ki, bu açıqlamanı Türkiyənin daxili işlər naziri Mustafa Çiftçi verib.
O, Ankaranın cinayətkarların ədalət mühakiməsindən yayınmamasını təmin etmək üçün xarici qurumlarla sıx əməkdaşlıq etdiyini bildirib.
Nazir Yunanıstana son səfərini nümunə olaraq göstərərək qeyd edib ki, təkcə bu ilin əvvəlindən bəri Türkiyə məhkəmələri tərəfindən 969 şəxs axtarış siyahısına salınıb və bu, cinayətkarlığa qarşı mübarizədə sıx beynəlxalq əməkdaşlığın vacibliyini göstərir.
M. Çiftçi vurğulayıb ki, hüquq-mühafizə orqanlarının prioritetlərindən biri əksəriyyəti eyni vaxtda bir neçə ölkədə fəaliyyət göstərən mütəşəkkil cinayətkar qruplara qarşı mübarizə aparmaqdır. “Əgər cinayətkarlıq sərhədləri aşarsa, ölkələr bununla birlikdə mübarizə aparmalıdır”, - deyə nazir bildirib.
Daxili işlər naziri qeyd edib ki, 2026-cı ilin ilk doqquz ayında Türkiyədə 625 mütəşəkkil cinayətkar qruplaşmanın üzvlərinə qarşı 1741 əməliyyat keçirilib ki, bunlardan 22-sinin xaricdə əlaqələri olub.
Bölmənin digər xəbərləri
