Nazir müavini: Elmi araşdırma və təhlillər düzgün qərarların qəbul edilməsində mühüm rol oynayır
Bakı, 9 oktyabr, AZƏRTAC
Elm və təhsil nazirinin müavini Firudin Qurbanov “Maarifçi” tələbə-məzun proqramının iştirakçıları ilə görüşüb.
Bu barədə AZƏRTAC-a Elm və Təhsil Nazirliyindən məlumat verilib. Bildirilib ki, görüşdə proqram iştirakçılarının əldə etdikləri bilik və bacarıqlar, qarşılaşdıqları çətinliklər, gələcək karyera perspektivləri və müasir əmək bazarının tələbləri barədə fikir mübadiləsi aparılıb.
Firudin Qurbanov gəncləri yaradılan imkanlardan səmərəli istifadə etməyə, praktiki təcrübə qazanmağa və öz üzərlərində daim işləməyə çağırıb. O, müasir əmək bazarında innovativ düşüncə, yaradıcı yanaşma, təşəbbüskarlıq, texnologiyalardan istifadə, ünsiyyət və komandada işləmək bacarıqlarının əhəmiyyətini vurğulayıb. “Maarifçi” proqramının əhəmiyyətindən danışaraq maarifçiliyin bilik və bacarıqların ötürülməsi, cəmiyyətin inkişafına töhfə verilməsi baxımından mühüm rol oynadığını bildirib. Qeyd edib ki, bu il proqrama rekord sayda müraciət daxil olub və seçim mərhələsinin nəticələrinə əsasən yeni iştirakçılar müəyyənləşdirilib.
Müasir dövrdə gənclərin qarşısında yeni vəzifələrin dayandığını bildirən Firudin Qurbanov XXI əsrin tələblərinə cavab verən bilik və bacarıqların, geniş dünyagörüşünün və müstəqil düşünmə qabiliyyətinin formalaşdırılmasının vacibliyini diqqətə çatdırıb.
O, dünyanın texnoloji inqilab dövrünü yaşadığını, rəqəmsallaşmanın sürətləndiyini və süni intellektin həyat tərzinə, eləcə də düşüncə proseslərinə əhəmiyyətli təsir göstərdiyini qeyd edib. Nazir müavini gənclərin süni intellekt alətlərindən istifadə etməklə yanaşı, onların iş prinsiplərini də anlamalı, texnoloji yeniliklərə uyğunlaşmağı bacarmalı olduqlarını vurğulayıb.
Firudin Qurbanov qərarların elmi araşdırma və təhlillərə əsaslanmasının əhəmiyyətinə də toxunub. Bildirib ki, bu yanaşma daha düzgün və əsaslandırılmış qərarların qəbul edilməsində mühüm rol oynayır.
Görüşdə 44 günlük Vətən müharibəsinin və qazanılan Zəfərin tarixi əhəmiyyəti də qeyd olunub. Nazir müavini şəhidlərin və qazilərin fədakarlığının ölkəmizin gələcək inkişafı üçün yeni imkanlar yaratdığını bildirib. İşğaldan azad edilmiş ərazilərdə təhsil infrastrukturunun bərpası və təhsil müəssisələrinin fəaliyyətinin təmin edilməsi istiqamətində görülən işlər barədə məlumat verilib.
Sonda proqram iştirakçılarını maraqlandıran suallar cavablandırılıb.
Qeyd edək ki, “Maarifçi” tələbə-məzun proqramı Elm və Təhsil Nazirliyi və Təhsilin İnkişafı Fondunun təşəbbüsü ilə həyata keçirilir. Proqramın məqsədi elm və təhsil sahəsində insan resurslarının inkişafına dəstək vermək, tələbə və məzunların praktiki fəaliyyət vasitəsilə sahəvi bilik və bacarıqlarını artırmaq, müasir yanaşmaları mənimsəmələrinə və təhsil islahatlarında iştiraklarına şərait yaratmaqdır.
Bölmənin digər xəbərləri
