Dmitro Şlapaçenko: İqlim dəyişmələri ilə bağlı problemlərin həlli üçün beynəlxalq əməkdaşlıq vacibdir
Bakı, 8 sentyabr, AZƏRTAC
İqlim dəyişmələri ilə bağlı problemlərin, o cümlədən gigiyena və digər məsələlərin həlli üçün kollektiv yanaşma və beynəlxalq əməkdaşlıq vacibdir.
AZƏRTAC xəbər verir ki, bunu Birləşmiş Millətlər Təşkilatının (BMT) Azərbaycandakı rezident-əlaqələndiricisi Dmitro Şlapaçenko “Bakı İqlim Fəaliyyəti Həftəsi 2026” çərçivəsində ikinci günün bağlanış mərasimində deyib.
O bildirib ki, iqlim gündəliyində əsas diqqət real təsirə yönəldilməlidir. Uğur yalnız qəbul edilən öhdəliklər, deklarasiyalar və elan olunan hədəflərlə deyil, həm də yerli səviyyədə əldə edilən konkret nəticələrlə ölçülməlidir: “Daha dayanıqlı icmalar, emissiyaların azaldılması, yaşıllaşdırılmış ictimai məkanlar, yüksək xidmətlər və nəticə etibarilə insanların həyat şəraitinin yaxşılaşdırılması əsas məqsəd olmalıdır”.
Dmitro Şlapaçenko BMT-nin Azərbaycandakı Ölkə Komandasının BMT-Habitatın rəhbərliyi ilə şəhər iqlim gündəliyinin inkişaf etdirilməsi istiqamətində Azərbaycan Hökumətinə dəstəyini davam etdirəcəyini vurğulayıb. O qeyd edib ki, bu dəstək siyasətlərin hazırlanması, potensialın gücləndirilməsi, texniki yardım, bilik mübadiləsi və tərəfdaşlıqlar vasitəsilə həyata keçiriləcək. Məqsəd “Bakı Fəaliyyətə Çağırışı”nda əksini tapan hədəflərin konkret nəticələrə çevrilməsinə, eləcə də şəhər komponentinin Azərbaycanın iqlim məqsədləri və dayanıqlı inkişaf prioritetlərinə inteqrasiyasına töhfə verməkdir.
Bölmənin digər xəbərləri
