DÖVLƏT BAŞÇILARININ BİRGƏ MƏTBUAT KONFRANSI

23.05.2006 [18:30]
Çap et
A⁺ A^-

Sənədlərin imzalanmasından sonra dövlət başçılarının birgə mətbuat konfransı keçirildi. Mətbuat konfransında dövlət başçıları bəyanatlarla çıxış etdilər. Bildirildi ki, indiki zirvə görüşündə “Demokratiya və iqtisadi inkişaf uğrunda təşkilat – GUAM” beynəlxalq qurumu yaradılmışdır. Nizamnaməyə əsasən, dörd səviyyədə (dövlət başçıları, xarici işlər nazirləri, milli əlaqələndiricilər və daimi nümayəndələr) Şura, təşkilatın daimi katibliyinin yaradılması nəzərdə tutulur. Təşkilatın iqamətgahı Kiyevdə yerləşəcək və burada hər ölkənin öz nümayəndəsi olacaqdır. Dörd ölkəni birləşdirən azad ticarət zonasının yaradılması barədə protokol da imzalanmışdır. Bu, üzv ölkələrin iqtisadi inkişafına təkan verəcək, sərmayələrin cəlb olunmasına və yeni iş yerlərinin açılmasına xidmət edəcəkdir.

Eyni zamanda bildirildi ki, Azərbaycan Prezidenti İlham Əliyev təşkilatın baş katibi seçilmişdir. Bu, Azərbaycanın beynəlxalq aləmdə əldə etdiyi uğurların və ölkəmizin iqtisadi inkişafının təsdiqi kimi qiymətləndirildi.

Təşkilatda sədrlik rotasiya əsasında olacaqdır.

Sonra dövlət başçıları jurnalistlərin suallarına cavab verdilər.

X X X

Mətbuat konfransından sonra Azərbaycan, Ukrayna, Moldova və Gürcüstan prezidentləri zirvə görüşü münasibətilə Ukraynanın poçt xidməti tərəfindən buraxılmış yeni poçt markalarının təqdimat mərasimində iştirak etdilər. Dövlət başçıları poçt markalarını imzaladılar və sonra xatirə şəkli çəkdirdilər.

Bununla da GUAM-ın üzvü olan ölkələrin dövlət başçılarının zirvə toplantısı başa çatdı.