Dövlət Neft Şirkətinin təlim, tədris və sertifikatlaşdırma idarəsində ekoloji layihələr uğurla davam etdirilir
Bakı, 22 avqust (AZƏRTAC). Azərbaycan Respublikası Dövlət Neft Şirkətinin (ARDNŞ) təlim, tədris və sertifikatlaşdırma idarəsində işçilərin ekoloji təhsili, maarifləndirilməsi və ekoloji problemlərin planlı şəkildə həlli üçün hər il “TS EN İSO 14001 Ekologiya İdarəetmə Sistemi” üzrə beynəlxalq, “ARDNŞ-in ekoloji siyasəti”, “Tullantıların idarə olunması” və “Qazma işləri aparılan zamanı ətraf mühitə təsir edən tullantıların idarə olunması”, “Dənizdə və quruda neft-qaz istehsalı sahələrində neft dağılmalarının qarşısının alınması və onların nəticələrinin aradan qaldırılması üçün işçilərin hazırlanması” mövzularında maarifləndirmə kursları təşkil olunur.
AZƏRTAC xəbər verir ki, idarənin kadr hazırlığının təşkili mərkəzində “ARDNŞ-in ekoloji siyasəti” mövzusunda maarifləndirmə kursu müasir standartlara uyğun, yüksək səviyyədə təşkil olunmuşdur.
“Ətraf mühitin mühafizəsi” mövzusunun daha səmərəli keçirilməsi məqsədi ilə dinləyicilər ekologiya idarəsinin kompleks tədqiqatlar laboratoriyasında olmuş, laboratoriyanın fəaliyyəti və burada istifadə edilən ən müasir cihaz və avadanlıqla yaxından tanış olmuş və onları maraqlandıran suallar laboratoriyanın ixtisaslı mütəxəssisləri tərəfindən cavablandırılmışdır.
Sonra ekoloji ölçmə və tullantıların idarə olunması departamentinin fəaliyyəti ilə yaxından tanış olan dinləyicilərə nəqliyyat vasitələrindən atmosferə atılan zərərli qazların tərkibi və ARDNŞ-in idarə və müəssisələrində istismar edilən avtomobillərdən atmosferə atılan zərərli qazların miqdarının azaldılması və daim nəzarətdə saxlanılması istiqamətində görülən işlər barədə ətraflı məlumat verilmişdir.
Bundan əlavə kurs iştirakçıları “Ekoloji park”ı da gəzmiş və ən müasir standartlara cavab verən 5 min kvadratmetrlik şitilxana kompleksində yetişdirilən ağaclar, otaq bitkiləri, müxtəlif növ bəzək gülləri ilə tanış olmuşlar. Burada külək generatoru və günəş panelləri dinləyicilərin böyük marağına səbəb olmuşdur.
Həmçinin dinləyicilərə “Ekoloji-park”ın yaradılmasının qısa tarixçəsi, məqsədi, parkda görülən işlər və gələcək planlar, “Ekomərkəz”, həmçinin parkın alternativ enerji vasitələri haqqında ətraflı məlumat verilmişdir.
Dinləyicilər parkda fəaliyyət göstərən qapalı şitilxananın toxum, böyütmə, oranjereya şöbələrində aparılan işlər, becərilən və yerli şəraitə uyğunlaşdırılmış ağac-kol növləri, o cümlədən parkda qorunaraq çoxaldılan endemik, relikt, nadir və nəsli kəsilmək təhlükəsi olan bəzi bitki növlərinin çoxaldılma üsulları haqqında məlumat əldə etmişlər.
Bölmənin digər xəbərləri
