SİYASƏT

DÖVLƏT QULLUĞUNU İDARƏETMƏ ŞURASININ İLK İCLASI KEÇİRİLMİŞDİR

21.04.2004 [20:27]
Çap et
A⁺ A^-

Aprelin 21-də Prezident sarayında Azərbaycan Respublikasının Dövlət Qulluğunu İdarəetmə Şurasının ilk iclası keçirilmişdir. İclasda Dövlət Qulluğunu İdarəetmə Şurasının 18 üzvü, Şuranın Əsasnaməsinə uyğun olaraq, Azərbaycan Respublikasının Prezidenti tərəfindən təyin olunmuş 6 üzv – Prezident Administrasiyasının rəhbəri Ramiz Mehdiyev, Administrasiyanın Ümumi şöbəsinin müdiri Süleyman İsmayılov, Ərazi idarəetmə orqanları ilə iş şöbəsinin müdiri Yusif Hümbətov, Nazirlər Kabineti Aparatının rəhbəri Ağabala Hacıyev, gənclər, idman və turizm naziri Əbülfəz Qarayev, Azərbaycan Respublikasının Prezidenti Yanında Dövlət İdarəçilik Akademiyasının rektoru Seyfəddin Qəndilov, Milli Məclisin sədri tərəfindən təyin olunmuş üzvlər – parlamentin İnsan hüquqları daimi komissiyası sədrinin müavini Rəbiyyət Aslanova, deputat, YAP-ın icraçı katibi Əli Əhmədov, maliyyə naziri Əvəz Ələkbərov, parlamentin Elm və təhsil məsələləri daimi komissiyasının sədri Şahlar Əsgərov, Naxçıvan MR Ali Məclisi sədrinin müavini Zahid Əzimov (Milli Məclis sədrinin birinci müavini Arif Rəhimzadə Moskvada səfərdə olduğuna görə iştirak etmirdi) və Konstitusiya Məhkəməsinin sədri tərəfindən təyin olunmuş üzvlər – Azərbaycan MEA-nın prezidenti Mahmud Kərimov, Nazirlər Kabinetinin hüquq şöbəsinin müdiri Günəş Vəliyeva, Milli Məclisin Dövlət quruculuğu üzrə qanunvericilik şöbəsinin müdiri Lətif Hüseynov, Ədliyyə Nazirliyinin Qanunvericilik və hüquqi təbliğat idarəsinin rəisi Dilarə Rəhimova, Konstitusiya Məhkəməsinin Konstitusiya hüququ məsələləri şöbəsinin müdiri Dürdanə Məmmədova, parlamentin Beynəlxalq münasibətlər şöbəsinin müdiri Namiq Əliyev, habelə dəvət olunmuş şəxslər iştirak edirdilər.

Prezident Administrasiyasının rəhbəri Ramiz Mehdiyev iclası açaraq gündəlik barədə məlumat verdi. Gündəliyə Dövlət Qulluğunu İdarəetmə Şurası sədrinin seçilməsi, Şura yanında korrupsiyaya qarşı mübarizə üzrə komissiyanın sədrinin seçilməsi və dövlət orqanlarında dövlət qulluğuna qəbul üçün keçirilən test imtahanlarından ötrü test nümunələrinin hazırlanması məsələləri daxil idi.

Birinci məsələnin müzakirəsində Prezident Administrasiyasının rəhbəri Ramiz Mehdiyevin Dövlət Qulluğunu İdarəetmə Şurasının sədri seçilməsi təklif olundu. Şuranın üzvləri bu təklifə yekdilliklə səs verdilər.

Şuranın sədri Ramiz Mehdiyev ikinci məsələ ilə əlaqədar bildirdi ki, Dövlət Qulluğunu İdarəetmə Şurası yanında Korrupsiyaya Qarşı Mübarizə üzrə Komissiya 11 nəfərdən ibarət tərkibdə yaradılmışdır: Azərbaycan Prezidenti tərəfindən təyin olunmuş üzvlər - Ramiz Mehdiyev (Prezident Administrasiyasının rəhbəri), Ramil Usubov (daxili işlər naziri), Şahin Əliyev (Prezident Administrasiyasının Qanunvericilik və hüquq ekspertizası şöbəsinin müdiri), Fuad Ələsgərov (Prezident Administrasiyasının Hüquq mühafizə orqanları ilə iş şöbəsinin müdiri), Milli Məclis tərəfindən təyin olunmuş üzvlər – Ziyafət Əsgərov (Milli Məclis sədrinin müavini), Əli Əhmədov (YAP-ın icraçı katibi), Lətif Hüseynov (parlamentin Dövlət quruculuğu üzrə qanunvericilik şöbəsinin müdiri), Bəxtiyar Əliyev (Milli Məclisin deputatı) və Konstitusiya Məhkəməsi tərəfindən təyin olunmuş üzvlər - Fərhad Abdullayev (Konstitusiya Məhkəməsinin sədri), Südabə Həsənova (Ali Məhkəmənin sədri), Zakir Qaralov (Baş prokuror).

Sonra komissiya sədrinin seçilməsi məsələsi müzakirə edildi. Komissiyanın üzvləri Şuranın sədri Ramiz Mehdiyevi yekdilliklə Dövlət Qulluğunu İdarəetmə Şurası Yanında Korrupsiyaya qarşı Mübarizə üzrə Komissiyanın sədri seçdilər.

“Korrupsiyaya qarşı mübarizə haqqında” Azərbaycan Respublikası Qanununun tətbiq edilməsi barədə Azərbaycan Respublikası Prezidentinin 2004-cü il 3 mart tarixli Sərəncamına əsasən, Nazirlər Kabineti üç ay müddətində “Dövlət Qulluğunu İdarəetmə Şurası Yanında Korrupsiyaya Qarşı Mübarizə üzrə Komissiya haqqında Əsasnamə”nin layihəsini hazırlayıb Azərbaycan Respublikasının Prezidentinə təqdim etməlidir. Şuranın iclasında Prezident Sərəncamının həmin bəndinin icrası ilə əlaqədar müvafiq tapşırıqlar verildi.

Test nümunələrinin hazırlanması ilə bağlı məsələnin müzakirəsində Şuranın sədri bildirdi ki, bu iş həmin sahədə təcrübəsi olan Tələbə Qəbulu üzrə Dövlət Komissiyasının iştirakı ilə görülməlidir.

TQDK-nın sədri Məleykə Abbaszadə məlumat verdi ki, TASİS proqramı ilə birlikdə müxtəlif nazirliklərin, təşkilatların nümayəndələrindən ibarət işçi qrupu, beynəlxalq ekspertlər də cəlb olunmaqla, bu məsələ ilə məşğuldur və yaxın on gün ərzində test nümunələrinin layihəsi Şuraya təqdim olunacaqdır. İş prosesində Qanunun icrası ilə bağlı müəyyən məsələlər də qarşıya çıxır və bu barədə müvafiq təkliflər veriləcəkdir.