Dünya alimləri seysmik məsələlərin müzakirəsi üçün Bakıda toplaşıblar
Bakı, 26 aprel, AZƏRTAC
Aprelin 26-da Bakıda Azərbaycan Memarlıq və İnşaat Universitetinin (AzMİU) təşkilatçılığı, Elm və Təhsil Nazirliyi, Dövlət Şəhərsalma və Arxitektura Komitəsinin dəstəyi ilə “Seysmik Dayanıqlı Müasir Qurğular” (AERS 2023) Beynəlxalq Konqresi öz işinə başlayıb. Konqresin plenar iclasında Azərbaycandan olan elm adamları, istehsalat nümayəndələri ilə yanaşı, Türkiyə, Amerika Birləşmiş Ştatları, Yaponiya, Kanada, İtaliya, Böyük Britaniya, Birləşmiş Ərəb Əmirlikləri, Portuqaliya, Hindistan, Yunanıstan və digər ölkələrdən nüfuzlu alimlər iştirak ediblər.
AZƏRTAC xəbər verir ki, əvvəlcə qardaş Türkiyə Respublikasında bu ilin fevral ayında baş verən güclü zəlzələdə həyatını itirənlərin xatirəsi bir dəqiqəlik sükutla yad edilib.
AzMİU-nun rektoru, konqresin fəxri sədri professor Gülçöhrə Məmmədova çıxış edərək mövzunun aktuallığına diqqət çəkib. Rektor Türkiyədə çoxsaylı insan tələfatı ilə nəticələnən zəlzələni əsrin fəlakəti adlandıraraq dünya elminin və inşaat sektorunun yeni, həmçinin mühüm çağırışlarla üz-üzə olduğunu qeyd edib. Gülçöhrə Məmmədova Ulu Öndər Heydər Əliyevin “Bir hadisənin qarşısını almaq, o hadisə baş verəndən sonra nəticələrini aradan qaldırmaqdan daha asandır” fikrini sitat gətirərək seysmoloji araşdırmalarda yeni və dərinləşdirilmiş yanaşmanın, mütərəqqi texnologiyanın tətbiqi ilə risklərin müəyyən edilməsinin vacibliyini vurğulayıb. AzMİU-nun ölkəmizin yüzillik inşaat mühəndisliyi ali təhsil ənənəsini özündə birləşdirdiyini, universitetdə bu istiqamətdə yüksəkixtisaslı mühəndis kadrların yetişdirildiyini, bina və qurğuların inşası üzrə seysmoloji məsələlərin dərindən araşdırıldığını qeyd edən rektor konqresin universitet alimləri üçün yeni imkanlar yaradacağına, ölkəmizə və dünyaya böyük faydalar qazandıracağına əminliyini ifadə edib.
Dövlət Şəhərsalma və Arxitektura Komitəsinin sədri Anar Quliyev çıxış edərək konqresin əhəmiyyətinə diqqət çəkib və ölkəmiz üçün gələcək faydalarına toxunub.
Fövqəladə hallar nazirinin müavini Etibar Mirzəyev çıxışı zamanı konqres iştirakçılarına məruzələrini və elmi mülahizələrini Türkiyədə baş verən son zəlzələ fonunda yürütməyi tövsiyə edib. O bildirib ki, Azərbaycanda da zəlzələyə qarşı qabaqlayıcı tədbirlərin görülməsi və monitorinqlərin keçirilməsi vacibdir.
AMEA nəzdində Respublika Seysmoloji Xidmət Mərkəzinin baş direktoru Qurban Yetirmişli zəlzələlərin dağıntılarından qorunmaq üçün individual yanaşmanın vacibliyini qeyd edib.
Daha sonra AzMİU-nun Zəlzələ Mühəndisliyi Elmi-Tədqiqat Mərkəzi ilə dünyanın 7 mərkəzi - Yaponiya, ABŞ, Kanada, Türkiyə, Xorvatiya, Portuqaliya və Makedoniya arasında beynəlxalq əməkdaşlıq sazişləri imzalanıb.
Konqresin plenar iclası nüfuzlu alimlərin elmi məruzələri ilə davam etdirilib. Tokio Texnologiya İnstitutunun fəxri professoru, Yaponiya Seysmik İzolyasiya Cəmiyyətinin prezidenti Akira Wada “Seysmik izolyasiya yastıqları və sönüm cihazları üçün yeni yüksək performanslı dinamik sınaq təsisi” mövzusunda elmi məruzə ilə çıxış edib. Alim zəlzələ zamanı seysmik izolyasiya yastıqlarının əhəmiyyəti, Yaponiyanın bu istiqamətdəki təcrübələri və elmi-praktik perspektivlər haqqında geniş məlumat verib.
ABŞ-ın Arizona Universitetinin professoru Tribikram Kundu “Qeyri-dağıdıcı sınaq və struktur sağlamlığa nəzarət texnologiyasında son nailiyyətlər” mövzusunda məruzəsində bina və qurğuların sınaq yolu ilə seysmik davamlılığının yoxlanılması üzrə ən son elmi-texnoloji araşdırmalardan danışıb.
Konqresin sədri, AzMİU-nun professoru, Zəlzələ Mühəndisliyi Elmi-Tədqiqat Mərkəzinin direktoru Azər Qasımzadə isə “Yeni struktur seysmik izolyasiya sistemi” mövzusunda məruzə ilə çıxış edib. Alim seysmik izolyasiya üzrə yeni yanaşmanın vacibliyinə diqqət çəkib və bu istiqamətdə apardığı elmi araşdırmalar haqqında məlumat verib.
Kanada British Kolumbiya Universitetinin professoru, Zəlzələ Araşdırma Mərkəzinin direktoru Carlos E.Ventura, Türkiyənin Boğaziçi Universitetinin fəxri professoru Mustafa Erdik, İtaliya Casaccia Araşdırma Mərkəzinin direktoru professor Paulo Clemente, Türkiyənin Orta Doğu Texnik Universitetinin professoru Haluk Sucuoğlu və digər nüfuzlu alimlər də məruzə ilə çıxış ediblər.
Konqresin məqsədi zəlzələ mühəndisliyinin əsas hədəfləri istiqamətində aparılan tədqiqatlar haqqında hərtərəfli təsəvvürün əldə olunması, qurğuların seysmik həssaslıq dərəcəsinin azaldılması, mövcud inşaat norma və qaydalarında zəlzələ mühəndisliyinin əsas hədəflərindən olan üç dizayn amilinin hər birinə diqqətin artırılması, gələcək zəlzələlərin təsirinin qarşısının alınmasında müasir yeni qurğu sistemlərindən istifadəyə çağırış və bu kimi aktual məsələlərdən ibarət olub.
Konqresin nəticəsi olaraq “Mühəndislər layihə və tikintidə səhv etməsələr, zəlzələlər fəlakət deyil” şüarının mühəndislikdə tətbiqi, məruzə və elmi məqalələrin beynəlxalq “Springel” yayın evində (İsveçrə) və “Elmi əsərlər” jurnalının xüsusi buraxılışında çap edilməsi, Azərbaycan Memarlıq və İnşaat Universiteti ilə dünyanın aparıcı ölkələrinin zəlzələ mühəndisliyi üzrə elmi-tədqiqat mərkəzləri arasında əməkdaşlıq əlaqələrinin qurulması nəzərdə tutulur. Həmçinin gələcəkdə birgə layihələrin icrası, “Qurğular dinamikasında fəlakətsiz zəlzələ mühəndisliyi” beynəlxalq jurnalının təsisi və dərc edilməsi planlaşdırılır.
Bölmənin digər xəbərləri
