DÜNYANIN ƏN GÜCLÜ BƏDİİ GİMNASTİKA USTALARI MEDALLAR UĞRUNDA MÜBARİZƏYƏ BAŞLADILAR
Yeddi gün çəkəcək yarışlarda 9 dəst medalın sahibləri müəyyən ediləcəkdir. Bu medallara namizədlər arasında İrina Çaşşina (Rusiya), Anna Bessonova, Natalya Qodunko (Ukrayna), İnna Jukova (Belarus), Simona Peyçeva, Elizabet Paisiyeva (Bolqarıstan), Almudena Sid, Cenifer Kolino (İspaniya) və Aliyə Yusupova (Qazaxıstan) kimi məşhur idmançılar var. Azərbaycan gimnastları Dinarə Gimatova, Anna Qurbanova və Vəfa Hüseynova, eləcə də Anna Bitiyeva, Dina Qorina, Valeriya Yeqay, Alina Tryopina, Anastasiya Prosolova və Olesya Oleninanın yer aldığı qrup hərəkətləri üzrə yığmamız da bu məsul yarışlara ciddi hazırlaşmışlar.
Beynəlxalq Gimnastika Federasiyasının prezidenti Bruno Qrandi başda olmaqla, bu qurumun, habelə bütün qitələrin gimnastika təşkilatlarının rəhbərləri də çempionatı izləmək üçün paytaxtımıza gəlmişlər.
Çempionat başa çatdıqdan sonra oktyabrın 10-11-də Beynəlxalq Gimnastika Federasiyası İcraiyyə Komitəsinin iclası keçiriləcəkdir.
Oktyabrın 3-də isə Heydər Əliyev adına İdman-Konsert Kompleksində Beynəlxalq Gimnastika Federasiyası rəhbərliyinin iştirakı ilə bədii gimnastika üzrə 27-ci dünya çempionatına həsr edilmiş mətbuat konfransı keçirilmişdir.
Qurumun prezidenti Bruno Qrandi konfransda çıxış edərək, sonuncu dəfə Bakıda 2002-ci ildə olduğunu söyləmiş, ötən illərdə Azərbaycanın dinamik inkişaf etdiyini, bədii gimnastika sahəsində əldə olunan nailiyyətləri vurğulamışdır.
Respublika Gimnastika Federasiyasının vitse–prezidenti Altay Həsənov demişdir ki, bu cür mötəbər yarışların Bakıda keçirilməsi ölkəmizin Azərbaycanın həm də idman ölkəsi olduğunu bütün dünyaya bir daha nümayiş etdirmişdir. O, gimnastlarımızın hazırlıq səviyyəsinin yaxşı olduğunu, onların uğurlu çıxışına əminliyini bildirmişdir.
Yarışların ilk günündə dünyanın 8 ən güclü gimnastını müəyyən etmək üçün 150-dək idmançı iki qrupda mübarizə aparmışdır.
Topla hərəkətlərin nəticələrinə görə ilk üçlüyə rusiyalı Olqa Kopranova, İrina Çaşşina və Svetlana Putsinskaya daxildir. Azərbaycan gimnastları Anna Qurbanova və Dinarə Gimatova dördüncü–beşinci yerləri bölüşürlər.
İplə hərəkətlərdə isə ilk iki yeri ukraynalı Anna Bessonova və Natalya Qodunko tutmuşlar. Belaruslu İnna Jukova üçüncü yerdədir. Bolqarıstanlı Simona Peyçeva bu mərhələdə dördüncü, Elizabet Paisiyeva (Bolqarıstan) və Lyubov Çarkatina (Belarus) isə müvafiq olaraq beşinci-altıncı pillədə qərarlaşmışlar.
