Dünyanın mərkəzi bankları ötən ilin noyabrında 53,4 ton qızıl alıb
Bakı, 8 yanvar, AZƏRTAC
Ötən ilin noyabr ayında dünyanın mərkəzi bankları qızıl-valyuta ehtiyatlarında qızılın həcmini 53,4 ton artırıblar.
AZƏRTAC xəbər verir ki, bu barədə məlumat “World Gold Council” təşkilatının hesablamalarında öz əksini tapıb.
“2024-cü ilin sonlarında dünyanın mərkəzi bankları qızıl tələbatında aparıcı rol oynamağa davam ediblər. Bu, il ərzində müşahidə olunan tendensiyanın davamıdır. Qlobal iqtisadi qeyri-müəyyənlik şəraitində sabit və etibarlı aktiv tapmağa çalışan inkişaf etməkdə olan ölkələrin mərkəzi bankları bu istiqamətdə daha fəaldırlar”, - deyə təşkilatın analitikləri bildiriblər.
Noyabr ayında ən çox Polşa (21 ton), Özbəkistan (9 ton), Hindistan (8,4 ton) və Qazaxıstan (5,1 ton) mərkəzi bankları qızıl alıblar. Çin aprel ayından bəri ilk dəfə qızıl ehtiyatlarını əlavə olaraq beş ton artırdığını elan edib. Həmçinin qızıl alıcıları arasında İordaniya (4,1 ton), Türkiyə (3 ton), Çexiya (1,6 ton), Qana (1,2 ton), Monqolustan və Malta (hər biri bir tondan az) da var.
Noyabr ayında qızılın əsas satıcısı Sinqapur (5,2 ton) olub. Finlandiya Mərkəzi Bankı isə qızıl ehtiyatlarının 10 faiz azalaraq 44 tona endiyini bildirib.
Bölmənin digər xəbərləri
