Əfqanıstanda “Taliban” silahlıları hərbi bazaya hücum ediblər
Bakı, 3 may, AZƏRTAC
Əfqanıstanın qərbində “Taliban” hərəkatı silahlılarının hərbi bazaya hücumu nəticəsində azı 18 əsgər həlak olub, daha on nəfər yaralanıb.
AZƏRTAC xarici KİV-lərə istinadla xəbər verir ki, taliblər mayın 3-nə keçən gecə xüsusi olaraq qazılmış tunel vasitəsilə Fərah əyalətinin Bala-Baluk qəzasında yerləşən hərbi bazaya soxulublar. Əyalət qubernatorunun yerli KİV-lərə verdiyi məlumata görə, silahlılar bazada partlayış törədiblər. Qubernator həlak olanların dəqiq sayını deməyib. Bazaya hücum edilən zaman orada ümumilikdə 30 hərbçi olub.
Xatırladaq ki, ABŞ və “Taliban” ötən il fevral ayının sonlarında Qətərdə sülh sazişi imzalayıblar. Sazişə əsasən Birləşmiş Ştatlar və onun müttəfiqləri 14 ay ərzində bütün qoşunları Əfqanıstandan çıxarmalıdırlar. Həmçinin “Taliban” hərəkatı və Əfqanıstan hökuməti arasında danışıqlar və atəşkəs rejimi başlanmalıdır.
Bölmənin digər xəbərləri
